Mijëra mbështetës të opozitës protestuan të enjten në Tiranë ndërsa deputetët e tyre dhanë dorëheqjen nga mandatet parlamentare mes frikës për trazira.
Mbështetësit e opozitës brohoritën vendimin e udhëheqësve të tyre për të hequr dorë nga përfaqësimi në parlament ndërsa Komisioni Europian, ambasada e SHBA dhe institucione të tjera ndërkombëtare e kritikuan vendimin si një akt që “minon demokracinë”.
Opozita mblodhi mbështetësit e vet pranë sallës së seancave plenare të Kuvendit të Shqipërisë ku policia angazhoi rreth 1 mijë oficerë, të gjithë të pajisur me maska antigaz dhe një pjesë me kasketa dhe mburoja.
Policia pati paralajmëruar të mërkurën se kishte informacion për “plane për të sulmuar parlamentin” ndërsa udhëroi kompanitë e telekomunikimit të ndërprisnin valët telefonike në zonën e protestës. Gjithsesi nuk pati dhunë dhe disa mbështetës të opozitës u panë duke krijuar një kordon të vetin për të ndarë protestuesit nga forcat e policisë.
Disa të rinj hodhën fishekzjarre ndaj policisë para se kreu i demokratëve Lulzim Basha të drejtonte protestuesit për te ndërtesa e Kryesisë së Kuvendit në Bulevardin Dëshmorët e Kombit për të dorëzuar letrat e dorëheqjes nga mandatet.
Duke paralajmëruar për më shumë protesta, Basha i tha mbështetësve të tij: “Sot fillon udhëtimi ynë i shpresës. Sot ne i vumë drynin parlamentit të krimit”.
Para se të fillonte protesta, faktori ndërkombëtar lëshoi deklarata të njëpasnjëshme duke bërë thirrje për protesta paqësore.
Përfaqësuesja e Lartë e BE, Federica Mogherini dhe Komisioneri Johannes Hahn publikuan një deklaratë të përbashkët.
“Në lidhje me protestën e sotme në Tiranë, ne rikonfirmojmë të drejtën e qytetarëve për të bërë demonstrata paqësore si tipar thelbësor dhe një vlerë themelore e demokracisë por ne denoncojmë me forcë çdo retorikë nga udhëheqësit politikë që bëjnë thirrje për dhunë.”
Ambasada e SHBA tha: “Shtetet e Bashkuara nxisin të gjithë pjesëmarrësit në demonstratat e sotme të ushtrojnë në mënyrë paqësore të drejtën e tyre për tubim dhe të refuzojnë dhunën si dhe i bën thirrje qeverisë dhe forcave të sigurisë të ushtrojnë vetëpërmbajtje.”
Sekretari i Përgjithshëk i Këshillit të Europës Thorbjørn Jagland shtoi: “Të gjitha palët duhet të vetëpërmbahen nga retorika për dhunë dhe nga dhuna në rrugë.”
Shqipëria hyri në një territor të panjohur pas vendimit të opozitës për të hequr dorë nga mandatet parlamentare. Më herët, partitë e opozitës kanë bojkotuar parlamentin, por nuk kanë hequr dorë nga mandatet.