Një ditë pas protestës së opozitës para hyrjes së parlamentit, policia njoftoi procedimin e 8 protestuesve dhe shpalli në kërkim 12 persona, të cilët i akuzon për dhunë.
Policia njoftoi të mërkurën se kishte nisur procedim penal për tetë protestues dhe kishte shpallur në kërkim 12 persona, të cilët i akuzon për “Prishje të rendit dhe qetësisë publike” dhe “Kundërshtim të punonjësit të rendit publik”.
Në një njoftim për shtyp policia bëri me dije se procedimet ishin vendosur pas analizimit të pamjeve filmike dhe “provave të tjera të mbledhura gjatë protestës së djeshme, ku u ça me forcë kordoni i Policisë dhe u goditën me sende të forta punonjësit”.
Protesta e thirrur nga partitë e opozitës pasditen e të martës kaloi në përplasje mes policisë dhe protestuesve të cilët synuan të hynin në në oborrin e Kuvendit të Shqipërisë. Policia u përgjigj duke hedhur gaz lotsjellës, ndërsa protestuesit hodhën gurë dhe shashka, ndërkohë që deputetët e maxhorancës ishin në seancë plenare.
Policia bëri me dije se gjatë protestës ishin “lënduar 2 punonjës policie, si dhe kanë marrë mjekim nga gazi lotsjellës 8 shtetas”.
Protesta u thirr me urgjencë pasi një njoftimi për një seancë jashtë rradhe të Kuvendit, në të cilin tani ndodhen vetëm deputetët e shumicës dhe përshkallëzoi në dhunë kur disa dhjetëra protestues shtynë kordonin policor për disa sekonda por u detyruan të tërhiqen kur policia iu përgjigj me bomba me gaz lotsjellës.
Protesta zgjati rreth katër orë, derisa pasi ishte votuar rendi i ditës përfshi miratimi i buxhetit e strukturave për Këshillin e Lartë të Prokurorisë dhe atë Gjyqësorë, kryetari i Kuvendit Gramoz Ruçi mbylli seancën. Deputetët socialistë dolën në këmbë përmes pedonales së Tiranës dhe protestuesit u shpërndanë.
Partia Demokratike dhe Lëvizja Socialiste për Integrim, dy forcat kryesore opozitare, nisën një valë protestash më 16 shkurt. Më 21 shkurt, shumica dërrmuese e deputetëve të dy partive politike dhanë dorëheqjen nga mandatet e tyre dhe shpallën synimin për të rrëzuar qeverinë përmes protestave.
