Një automjet në të cilin udhëtonin një punonjës i INUV, në Bashkinë Lezhë dhe një persona tjetër është qëlluar me armë zjarri. Policia njoftoi se asnjë nga personat që ndodheshin në makinë nuk u lëndua.
Një automjet në të cilin udhëtonin një punonjës i Inspektoratit Ndërtimor Urbanistik Vendor (INUV), në Bashkinë Lezhë dhe një ish-punonjës i Njësisë Administrative të Zejmenit është qëlluar me armë zjarri mëngjesin e të mërkurës. Policia njoftoi se asnjë nga personat që ndodheshin në makinë nuk u lëndua nga të shtënat. Ndërkohë në një reagim për mediat Bashkia Lezhës mohoi që ngjarja të kishte lidhje me punën e inspektorit pranë bashkisë dhe i kërkoi policisë të zbardhë incidentin.
Ngjarja ndodhi paraditen e së merkures në superstraden Lezhë-Laç, në afërsi të fshatit Tresh. Mirel Ndoka dhe Edmond Mhillaj sipas policisë po udhëtonin me një automjet tip “Ford Focus” në drejtim të Milotit, kur janë qëlluar me pistoletë nga persona që udhetonin me një automjet tjetër.
Dy plumba kanë kapur pjesën e poshte të makinës, por fatmiresisht personat që ishin shenjestër e sulmit nuk kanë marrë lëndime. Pasi kanë qëlluar në drejtim të makinës autoret të cilët nuk janë identifikuar ende janë larguar me shpejtësi në drejtim të Milotit. “Policia ka nisur hetimet në lidhje me ngjarjen, ndërsa në cilësinë e provës materiale janë sekuestruar 2 gëzhoja pistolete dhe kamerat e sigurisë të një karburanti pranë vendit ku ndodhi ngjarja”, njoftoi policia.
Sipas saj ishin shoqëruar disa persona, dëshmitarë okularë, të cilët po merren në pyetje rreth ngjarjes si dhe janë ngritur pika kontrolli për kapjen e autoreve. Dy personat ndaj të cilëve u qëllua thanë në polici se nuk kanë konflikte, ndërsa pista kryesore e hetimit është përqëndruar tek detyra e zyrtarit të INUV-it Mirel Ndoka i cili ishte dhe drejtuesi i automjetit që u sulmua me armë.
Megjithatë Bashkia Lezhë në një reagim të sajin, pasi dënoi ngjarjen, pretendoi se “kjo ngjarje nuk ka asnjë lidhje me punën e inspektorit tonë në bashki apo rrethana të tjera të kësaj natyre, siç dhe pohon vetë ai”. Bashkia i kërkoi policisë të zbardhë incidentin. Pak javë më parë zyrat e një njësie administrative në Lezhë u qëlluan me armë nga persona ende të paidentifikuar.