Policia shpalli në kërkim një 24-vjeçar i cili dyshohet se qëlloi me mjete të forta duke i shkaktuar plagë të rënda mjekut Zef Doda.
Një mjek i spitalit të Lezhës mori plagë të rënda, pasi u godit me sende të forta nga një pacient 24-vjeçar. Ngjarja sipas policisë ndodhi mesditen e së enjtes, ndërsa mjeku Zef Doda ishte në punë në ambjentet e spitalit të Lezhës. Policia shpalli në kërkim Eduart Lleshin nga Mirdita i cili dyshohet si autor i goditjes së mjekut me sende të forta.
Mjeku mori dëmtime serioze në kokë, pasi është qëlluar disa herë me sende të forta. Pasi ndihmës së parë nga koleget e tij në Lezhë mjeku Doda është dërguar për trajtim më të specializuar në spitalin e traumës në Tiranë, ndërsa agresori është larguar menjëherë pas ngjarjes duke i shpëtuar policisë.
Dëshmitarë të ngjarjes i thanë BIRN se agresori kishte kërkuar të vizitohej pa pasur referim nga mjeku i familjes, por kjo nuk është pranuar nga mjeku Doda. Kjo solli konfliktin dhe më pas dhunën. Mjekë në spitalin e Lezhës dënuan ngjarjen, ndërsa paralajmëruan protesta pasi ndihen të diskriminuar dhe të pasigurt në vendin e punës.
