Pasi një gjyqtar i emëruar nga Dhomat e Specializuara me seli në Hagë u pa duke darkuar me një avokat kosovar, klientët e të cilit janë thirrur për t’u marrë në pyetje, gjykatës së krimeve të luftës iu bë thirrje të kujdeset më shumë për të demonstruar paanshmërinë e saj.
Gjyqtarët në Dhomat e Specializuara në Hagë, të cilat do të gjykojnë ish-luftëtarët e Ushtrisë Çlirimtare të Kosovës për krime lufte dhe paslufte, duhet të jenë të bëjnë kujdes me ata që takojnë për të ruajtur besimin e të gjithë atyre që merren me hetimet dhe gjykimet, tha Fondi për të Drejtën Humanitare në Kosovë.
Thirrja e Fondit për të Drejtën Humanitare erdhi pasi gjyqtari Vladimir Mikula, i cili është emëruar në Dhomat e Specializuara, u patë darkonte me avokatin kosovar Arianit Koçi në një restorant në Prishtinë.
Koci është avokati i ish-komandantëve të Ushtrisë Çlirimtare të Kosovës Rrustem Mustafa dhe Sami Lushtaku, të cilët tashmë janë pyetur nga Zyra e Prokurorit të Specializuar në Hagë për krime që mund të jenë subjekt i ndjekjeve penale.
“Edhe sikur të ishte një darkë shoqërore apo rastësore, gjyqtari me sjelljet e tij jashtë gjykatës duhet të ruajë dhe theksojë besimin e publikut dhe palëve në paanshmërinë e tij dhe gjyqësorit në përgjithësi,” tha për BIRN Amer Alija nga Fondi për të Drejtën Humanitare në Kosovë.
Alija tha se gjykatësit e Dhomave të Specializuara duhet të shmangin çdo veprim që mund të ndikojë në funksionet e tyre gjyqësore.
Megjithatë, incidenti i darkës “nuk duhet të vërë në dyshim paanësinë e gjykatës”, shtoi Alija.
Dhomat e Specializuara të Kosovës konfirmuan se Mikula është emëruar në listën e gjykatësve ndërkombëtarë.
Por gjykata shpjegoi se gjyqtarëve në listë “thjesht u kërkohet të ushtrojnë funksione zyrtare me kërkesën dhe me caktimin e kryetare së Dhomave të Specializuara Ekaterina Trendafilova”.
“Gjyqtarit Mikula nuk i është caktuar ndonjë rast nga kryetarja e gjykatës Trendafilova dhe prandaj nuk jemi në gjendje të komentojmë më tej,” tha Angela Griep, kreu i Njësisë së Informacionit dhe Komunikimit Publik në Dhomat e Specializuara.
Kryetarja e gjykatës Trendafilova lëshoi një deklaratë të mërkurën duke theksuar se Mikula nuk ka qasje në asnjë informacion konfidencial rreth aktiviteteve të Dhomave të Specializuara të Kosovës, KSC ose Zyrës së Prokurorit të Specializuar, SPO.
“Unë përsëris se mandati i KSC është të sigurojë procedura të sigurta, të pavarura dhe të paanshme. KSC mbetet e angazhuar thellë për këtë mandat dhe vepron në përputhje me këtë,” thuhej në deklaratën e Trendafilovës.
“Mbrojtja e dëshmitarëve mbetet një çështje thelbësore për KSC dhe SPO,” shtoi ajo.
Misioni i BE-së për sundimin e ligjit në Kosovë, EULEX, tha se Mikula aktualisht mban postin e Monitoruesit të Drejtësisë në organizatë.
Prandaj “në përputhje me mandatin aktual të EULEX-it, ai nuk mban asnjë funksion ekzekutiv gjykimi”, tha EULEX në një deklaratë.
Ai shtoi se misioni nuk është në gjendje të komentojë mbi angazhimet private të Mikulës.
Ndërkohë, avokati Arianit Koçi tha për BIRN se ai ishte në një vend publik me gruan e tij, miqtë e saj dhe trajnerin e saj të palestrës dhe se nuk e dinte që Mikula do të ishte në tryezën e restorantit.
“Kishte mbi 15 veta – një grup individësh që çdo mëngjes kryejnë aktivitete fizike në të njëjtën palestër ku shkon ime shoqe Merita,” tha Koci.
Dhomat e Specializuara priten të gjykojnë ish-luftëtarët e UÇK-së për krime përfshirë vrasje, rrëmbime, ndalime të paligjshme dhe dhunë seksuale. Megjithatë, ende nuk është ngritur asnjë aktakuzë.
Dhomat e Specializuara dhe Zyra e Prokurorit të Specializuar janë pjesë e sistemit ligjor të Kosovës, por ndodhen në Holandë dhe kanë personel ndërkombëtar.
