Avokati Ravik Gurra, 50 vjeç u ekzekutua mbrëmjen e së premtes nga persona ende të paidentifikuar nga policia. Kolegët e tij dënojnë aktin e rëndë dhe kërkojnë mbrojtje nga institucionet.
Avokatët e Dhomës së Avokatisë Elbasan vendosën të bojkotojnë për 5 ditë seancat gjyqësore në shenjë proteste ndaj vrasjes së avokatit Ravik Gurra, i cili u ekzekutua mbrëmjen e së premtes nga persona të paidentifikuar.
Kryetari i Dhomës së Avokatisë Elbasan, Hysen Kovaçi dënoi “aktin e rëndë dhe të paprecedentë” mëngjesin e së hënës dhe kërkoi mendimin e avokatëve për vazhdimin e protestës. Gjatë mbledhjes, avokatët u ankuan për mungesën e reagimit të institucioneve ndaj vrasjes së avokatit Gurra dhe kërkuan marrjen e masave për mbrojtjen e jetës së tyre.
“Vendimi përfundimtar i avokatëve të Elbasanit është bojkoti 5 ditor, në pritje të një reagimi nga organet kompetente. Të premten, avokatët do të mblidhen sërish për vazhdimin e protestës,” tha përfaqësuesi i Dhomës së Avokatisë, Demir Çiftja.
Një prej avokateve më të vjetra të Elbasanit e ka cilësuar një goditje për një nga kollonat e shtetit ligjor vrasjen e avokatit Ravik Gurra.
“Goditjet e gjyqtarëve dhe prokurorëve janë të rënda, por goditja e institucionit të avokatit është akoma më e rëndë,” tha Eni Fortuzi Kungulli.
Ravik Gurra, 50 vjeç u ekzekutua mbrëmjen e së premtes në një lokal në qytetin e Elbasanit nga persona ende të paidentifikuar nga policia. Përmes një njoftimi, policia tha se makina e përdorur nga autori u gjet e djegur pak kohë pas vrasjes.
Krimi është klasifikuar si vrasje për shkak të detyrës dhe ka kaluar për hetim të mëtejshëm në Prokurorinë e Krimeve të Rënda. Policia nuk ka dale ende me të dyshuar për këtë ngjarje, edhe pas sekuestrimit të pamjeve filmime dhe këqyrjes së vendit të ngjarjes.
Avokatët e Elbasanit kërkuan mëngjesin e së hënës që bojkotit t’u bashkohen edhe kolegët e tyre në qytete të tjera, duke e konsideruar krimin të paprecedentë në historikun e avokatisë shqiptare. Avokatët kanë kërkuar gjithashtu mbështetjen nga institucioni i gjykatës që të mos i penalizojë klientët e tyre për shkak të mungesës së avokatëve.
