Në analizën vjetore me prokurorët e Krimeve të Rënda dhe ata të Tiranës, Marku shigjetoi prokurorët për rrjedhjen e informacioneve në media dhe u kërkoi atyre që t’i mbajnë larg gazetarët nga hetimet.
Prokurorja e Përgjithshme e Përkohshme, Arta Marku shigjetoi të mërkurën prokurorë të Krimeve të Rënda dhe ata të Tiranës për rrjedhjen e informacioneve të dosjeve “të nxehta” në media. Ajo kërkoi gjithashtu moszvarritje të hetimeve dhe zbatim më të mirë të ligjit “Antimafia” për hetimet pasurore.
Kritikat u bënë në analizat vjetore të zhvilluara në Prokurorinë e Krimeve të Rënda, Prokurorinë e Tiranës dhe atë të Apelit, ku Marku u shoqërua edhe nga kryetari i KLP-së, Gent Ibrahimi.
“Gjatë këtij viti, disa prokurorë të tjerë, nga radhët tuaja, na kanë bërë që të na vijë turp që jemi prokurorë. E kanë keqpërdorur funksionin e tyre të ndjekjes penale, duke nxjerrë informacion, dokumentacion, pa dashur t’ia dinë për ruajtje të sekretit hetimor, apo për parimet bazë mbi të cilat duhet të ushtrojnë funksionin,” tha Marku duke iu referuar informacioneve mbi dosjet e rëndësishme që ndodhen në hetim nga Prokuroria.
“Duke u kujdesur që të bënin këtë që nuk duhet të bënin, kanë harruar të kryejnë detyrën, të hetojnë dhe të kryejnë hetime proaktive aty ku duheshin kryer,” shtoi ajo.
Kryeprokurorja Marku, e cila pritet të garojë për një mandat të plotë në krye të Prokurorisë së Përgjithshme u ndal te çështjet që kanë dominuar debatin publik apo siç tha ajo “kanë trazuar politikën në vend”.
“Kushdo i njeh këto çështje, madje edhe me numra dhe kjo mund të jetë gjithçka por jo një situatë normale”, tha Marku. “Mbani larg mediat nga hetimi. Gazetarët nuk janë dhe nuk duhet të jenë pjesë e grupit hetimor, ashtu siç po i trajtoni ju,” shtoi ajo.
Marku u kërkoi prokurorëve të mos lënë pas dore hetimet pasurore në kuadër të ligjit Antimafia si dhe të hetojnë sa më shpejt çështjet që kanë tronditur opinionin publik.
“Hetimi të jetë objektiv, i pavarur dhe i gjithëanshëm”, tha ajo gjatë pjesës së takimeve që u zhvilluan në prani të mediave.
Më 19 mars, Marku mori pjesë në analizën vjetore të punës në Prokurorinë e Vlorës ku ajo u shpreh se kishte apati dhe zbulueshmëri të ulët të krimit që kishte ndodhur në këtë qytet.
