Gjykata për Krime të Rënda ka hedhur poshtë një kërkesë të ish-Prokurorit të Përgjithshëm, Adriatik Llalla kundër zgjatjes së hetimeve ndaj tij për pastrim parash.
Gjyqtari në Gjykatën e Shkallës së Parë për Krime të Rënda, Bib Ndreca vendosi të hënën të rrëzojë ankimin e ish-Prokurorit të Përgjithshëm Adriatik Llalla, i cili kundërshtoi vendimin e Prokurorisë së Krimeve të Rënda për zgjatje me tre muaj të hetimeve të nisura në ngarkim të tij.
Në seancën që u zhvillua me dyer të mbyllura nuk ishte i pranishëm ish-numri një i akuzës, por vetëm përfaqësuesi i tij ligjor, Sokol Hazizaj. Ky i fundit, në përfundim të seancës nuk iu përgjigj interesimit të medieve lidhur mbi vendimmarrjen e gjykatës. Ndërkohë, një burim zyrtar në Gjykatën e Shkallës së Parë për Krime të Rënda pohoi për BIRN se u vendos rrëzimi i kërkesës së Llallës duke i hapur kështu rrugë zgjatjes së hetimeve edhe për tre muaj të tjerë.
Hetimi ndaj Llallës u regjistrua fillimisht nga Prokuroria e Durrësit më 15 mars 2018 nën akuzën e fshehjes së pasurisë, shpërdorimit të detyrës dhe pastrimit të parave. Akuza ndaj Llallës përfshin edhe veprat penale të “mosdeklarimit të shumave monetare në kufi”. Në korrik 2018, Gjykata e Krimeve të Rënda, me kërkesë të prokurorisë sekuestroi pronat e ish-Prokurorit të Përgjithshëm. Në një njoftim për shtyp të mëparshëm, Prokuroria e Krimeve të Rënda bëri të ditur se Llallës iu vendosën nën sekuestro një apartament 67 metra katrorë në Durrës dhe katër parcela toke me sipërfaqe të përgjithshme prej rreth 22 mijë metrash katrorë në periferi të Tiranës.
Një investigim i mëparshëm i BIRN tregoi se si Llalla transformoi një investim fillestar prej 16.3 milionë lekësh në prona me vlerë mbi 1 milionë euro përmes transaksioneve me një person të dënuar për vrasje, një biznesmen-fitues tenderi në Prokurori dhe një instruktor hipizmi i përdorur si sekser tokash.
Së fundmi, Llalla ka punësuar dy lobistë nga Nju Jorku për të kundërshtuar vendimin e Departamentit të Shtetit që e shpalli “persona non-grata” në SHBA. Pas gati 1 viti e gjysmë pa punë dhe me asetet e tij të ngrira nga Prokuroria, mbetet e paqartë se me çfarë mjetesh financiare e ka siguruar ai shërbimin e studios ligjore amerikane ‘Sher Tremonte LLP’.
