Këshilli i Lartë Prokurorisë(KLP) njoftoi se ka përcaktuar anëtarët e Komisionit të Posaçëm për vlerësimin e kandidatëve për Strukturën e Posaçme Antikorrupsion (SPAK).
Këshilli i Lartë Prokurorisë(KLP) njoftoi të hënën se gjatë seancës plenare të kësaj dite ka përcaktuar anëtarët e Komisionit të Posaçëm për vlerësimin e kandidatëve për Strukturën e Posaçme Antikorrupsion (SPAK).
Tre prej anëtarëve të këtij komisioni janë ata të Komisionit të Karrierës, konkretisht: Arben Dollapaj, Sandër Beci dhe Bujar Sheshi, i cili ka zëvendësuar Antoneta Sevdarin e cila u largua pas vendimit të shkarkimit të Kolegjit të Posaçëm të Apelimit(KPA). Ndërkohë, dy anëtarët e tjerë janë ndarë, një nga radhët e prokurorëve Besnik Cani dhe një nga anëtarët jo prokurorë të KLP-së, Tartar Bazaj.
Nga anëtarët jo prokurorë kanë qenë tre kandidatë, kryetari i KLP-së, Gent Ibrahimi, Nurihan Seiti dhe Tartar Bazaj. Përzgjedhja e anëtarit jo prokuror është kryer me short dhe mes tre kandidatëve është përcaktuar Tartar Bazaj. KLP njoftoi se anëtari i pestë u zgjodh Besnik Cani, nga anëtarët prokurorë të Këshillit. Komisioni i Posaçëm do të kryejë vlerësimin e prokurororëve që po garojnë për të qenë pjesë e SPAK.
Gjatë kësaj seance, KLP vendosi edhe caktimin e përkohshëm për drejtuesin e Prokurorisë së Fierit dhe asaj të Lushnjës. Kështu, nga tre kandidatë për drejtues të përkohshëm në Prokurorinë e Fierit, prokurorja Violeta Shkurta ka siguruar më shumë vota nga kolegët e saj, prokurorët Çlirim Sino dhe Genci Mane. Ndërsa për pozicionin e drejtuesit të përkohshëm në Prokurorinë e Lushnjës është caktuar prokurori Arben Dyla i cili garoi përballë prokruroreve Rovena Zoto dhe Merita Selimi.
