Fondi Monetar Ndërkombëtar përsëriti në raportin e fundit për Shqipërinë kostot shtesë të administratës dhe biznesit të vogël nga vendosja e Tatimit mbi Vlerën e Shtuar prillin e kaluar ndërsa thekson se masa ka pak gjasa të sjellë ndonjë përmirësim në arkëtimet fiskale të qeverisë.
Fondi Monetar Ndërkombëtar përsëriti kritikat e veta ndaj masës kontroverse të qeverisë shqiptare të prillit 2018 për reduktimin e pragut të përjashtuar nga Tatimi i Vlerës së Shtuar për biznesin e vogël nga 5 në 2 milionë lekë xhiro në vit. FMN e ka kritikuar edhe më herët këtë masë si të paarsyeshme ndërsa thekson në raport se kjo nismë e qeverisë “Rama” rrit kostot si për biznesin e vogël ashtu edhe për administratën tatimore, por pa sjellë përfitime as për njërën palë dhe as për tjetrën.
“Zgjerimi i regjistrit të TVSH-së do të ketë një ndikim të vazhduar negativ në ngarkesën me punë të Drejtorisë së Përgjithshme të Tatimeve – si dhe kosto administrative për bizneset e vogla – pa sjellë ndonjë përfitim domethënës në të ardhura,” shkruhet në raportin e publikuar të martën më 3 prill 2019.
Raporti thotë se administrata tatimore u tregua profesionalisht e aftë në kryerjen e këtij tranzicioni përmes hartimit të një modeli të thjeshtëzuar deklarimi të TVSH-së për bizneset e vogla si dhe përmes një fushate masive komunikimi me këto biznese, por pavarësisht kësaj, përfitimet në objektivin e deklaruar të qeverisë konkretisht, “mbyllja e ciklit të TVSh-së” dhe rritja e të ardhurave buxhetore, sipas vlerësimit të FMN, ka pak gjasa të ndodhë.
This expansion of the VAT register ëill have an ongoing negative impact on the
“Drejtoria e Përgjithshme e Tatimeve duhet të lavdërohet për tranzicionin e suksesshëm të 13 mijë bizneseve të vogla në sistemin e TVSH-së në vitin 2018,” shkruhet në raport, i cili shton: “Menaxhimi i kësaj kohorte tatimpaguesish vendos një barrë shtesë mbi Drejtorinë e Përgjithshme të Tatimeve me përfitime të pakta në termat e të ardhurave”.
“Ajo vendos gjithashtu kostoo shtesë në bizneset e vogla dhe ka pak gjasa të sjellë ndonjë impakt materjal në reduktimin e hendekut fiskal”.
Qeveria shqiptare vendosi kundër këshillave të ekspertëve fiskalë, përfshirë ekspertëve të FMN, të fusë në regjistrin e TVSH-së të gjitha bizneset me xhiro mbi 2 milionë lekë në vit. Tatimet u përballën me manovra të ndryshme për të shmangur barrën administrative shtesë. Në dhjetor, parlamenti miratoi ndryshime të reja në ligj, ku ndaloi mes të tjerash, pasjen e dy nipteve nga i njëjti individ me synimin e shmangies së ndarjes së xhiros të të njëjtit biznes në dy bilance.