Organizatat e shoqërisë civile që po monitorojnë reformën në drejtësi vunë në dukje tejkalimin e afateve ligjore për ngritjen e SPAK dhe Gjykatës së Posaçme, ndërsa cilësuan shqetësues kufizimin e aksesit të informacionit nga KLGJ dhe KLP.
Kufizimi i informimit të publikut prej disa vendimarrjeve të Këshillit të Lartë Gjyqësorë dhe Këshillit të Lartë të Prokurorisë dhe vonesat në procesin e vettingut dhe atë të ngritjes së institucioneve të reja janë shqetësuese sipas një grupi organizatash qeveritare.
Komiteti Shqiptar i Helsinkit (KSHH), Instituti i Studimeve Politike (ISP) dhe Qendra për Studimin e Demokracisë dhe Qeverisjes (CSDG), të cilat me mbështejn e Fondacionit Shoqëria e Hapur për Shqipërinë, monitorojnë reformën në drejtësi publikuan një listë me 8 probleme të identifikuara prej tyre lidhur me zbatimin e reformës në drejtësi.
Në një deklaratë për shtyp organizatat shprehin shqetësim për vonesat në procesin e rivlerësimit, tejkalimin e afateve ligjore sa i përket krijimit të Strukturës së Posaçme Anti Korrupsion (SPAK) dhe Gjykatës së Posaçme, vonesat në emërimin e Prokurorit të Përgjitshëm dhe një sërë problemesh të tjera të zbatimit të reformës.
Tre organizatat po ashtu shprehën shqetësim për mungesën e transparencës prej dy këshillave të lartë të krijuar në fund të vitit që shkoi. “Vonesat po shoqërohen ndërkohë me mungesë transparence ndaj publikut, për procedurat, afatet dhe përgjegjësitë nga vetë organet e ngarkuara nga Kushtetuta dhe ligji”, thuhet në njoftimin për shtyp.
Organizatat fajësuan kryesisht për transparencë vendimmarrjet e KLGJ-së dhe KLP-së, që sipas tyre “kufizojnë aksesin për informim publik dhe monitorim para dhe gjatë realizimit të mbledhjeve plenare. Si rrjedhim, kjo situatë pamundëson jetësimin e parimit të transparencës, krijon elementë të dyshimit në integritetin e aktivitetit të institucioneve dhe ndaj mund të cenojë besimin e publikut në rezultatet dhe ecurinë e procesit”, thuhet në njoftim.
Po ashtu me shqetësim vërehet edhe tejkalimi i afateve për ngritjen e Gjykatave të Posaçme dhe SPAK. “Edhe pse kanë kaluar më shumë se 3 muaj nga ngritja e tyre (KLGJ dhe KLP), ende nuk ka informacion në lidhje me koordinimin ndërmjet dy organeve në drejtim të ngritjes së harmonizuar kohore të institucioneve të hetimit dhe gjykimit për veprat penale të korrupsionit dhe krimit të organizuar”, thuhet në njoftim.
Tone kritike ka edhe për trupat gjykuese të komisionit të Pavarur të Kualifikimit dhe Kolegjit të Posaçëm të Apelimit. “Edhe pse reforma në drejtësi po vijon, ajo ende po zhvillohet me ritme shumë të ngadalta”, thuhet në njoftim.
Sipas organizatave edhe pse është konsumuar gjysma e mandatit kohor kushtetues të Komisionit të Pavarur të Kualifikimit deri tani ai ka përfunduar procesin e rivlerësimit vetëm për 15% të të gjithë trupës së gjyqtarëve dhe prokurorëve.
Po ashtu nga vëzhgimi pranohet se një pjesë e institucioneve të reja kanë ende probleme të infrastrukturës. “KLP nuk ka ende një godinë definitive ku të ushtrojë në mënyrë permanente veprimtarinë e tij, ndërkohë që si KLP dhe KLGJ nuk i është alokuar ende buxheti, nuk janë pajisur me personelin administrativ mbështetës”, thuhet në njoftimin për shtyp.
