Kolegji i Posaçëm i Apelimit shkarkoi gjyqtarin e Tiranës Astrit Faqolli për deklarim të pamjaftueshëm në kriterin e pasurisë. KPA ndryshoi vendimin e Komisionit të Pavarur të Kualifikimit i cili kishte konfirmuar Faqollin.
Kolegji i Posaçëm i Apelimit (KPA) shkarkoi gjyqtarin e Tiranës Astrit Faqolli për deklarim të pamjaftueshëm në kriterin e pasurisë. Vendimi për Faqollin u mor të enjten nga një trupë gjykuese që përbëhej nga gjyqtarët Natasha Mulaj, Rezarta Schuetz, Ina Rama, Sokol Çomo dhe Luan Daci. Gjyqtari i shkarkuar nuk ishte i pranishëm në sallë gjatë leximit të vendimit.
KPA vendosi të ndryshojë vendimin e Komisionit të Pavarur të Kualifikimit (KPK) i cili më 25 korrik vendosi konfirmimin në detyrë të Faqollit, pas procesit të rivlerësimit në të tri kriteret. KPA bëri me dije se vendimi ishte bazuar vetëm në kriterin e pasurisë, i cili kishte qenë edhe objekt ankimi.
Astrit Faqolli e ka filluar karrierën në Gjykatën e Librazhdit ku ka punuar deri në vitin 2003. Me tej ai është transferuar si inspektor në Inspektoriatin e Këshillit të Lartë të Drejtësisë, ku ka punuar gjatë viteve 2003-2010. Në vitin 2010, Faqolli u emërua gjyqtar në Gjykatën e Durrësit dhe prej vitit 2013 ushtronte detyrën në Gjykatën e Tiranës.
Ky vendim i KPK u ankimua nga Komisioneri Publik (KP) Florian Ballhysa, i cili kërkoi shkarkimin e gjyqtarit duke pretenduar se ai nuk arrinte nivel të besueshëm në kriterin e vlerësimit të pasurisë.
“Komisioneri Publik, çmon se mbështetur në provat e administruara gjatë hetimit administrativ, vendimi nr.47, datë 25.07.2018 duhet të ndryshohet, duke u vendosur shkarkimi nga detyra të subjektit të rivlerësimit z. Astrit Faqolli, për shkak të deklarimit të pamjaftueshëm të pasurisë”, thuhet në kërkesën për apelim.
Gjatë shqyrtimit të çështjes në KPA Faqolli solli dokumente të reja për të justifikuar pasurinë e tij, ndërsa përmes avokatit akuzoi Komisionerin për qëndrime që kanë cënuar procesin e rregullt ligjor. “Komisioneri ka pasur qëndrim mohues për të mos marrë asnjë provë duke cënuar procesin e rregullt ligjor,” tha avokati i Faqollit Julian Mërtiri në prapësimet e mbrojtjes.
Kolegji pasi dëgjoi palët vendosi të enjten për shkarkimin e Faqollit duke gjetur si të provuara thuajse të gjitha pretendimet e Komisionerit Publik sa i përket pasurive të gjyqtarit.
Gjatë leximit të vendimit kryesuesja Natasha Mulaj, tha se Kolegji kishte gjetur se Faqolli nuk kishte pasur burime të ligjshme për kursimet e deklaruara, nuk kishte pasur burime për të blerë një apartament në Tiranë dhe një ndërtesë në Librazhd, kishte bërë deklarim të pasaktë dhe se personat që i kishin dhënë hua nuk arrinin të provonin se kishin burime të ligjshme për huadhëniet.
Kolegji arriti në përfundimin se Faqolli duhej të shkarkohej për “deklarim të pamjaftueshëm për kriterin e kontrollit pasurisë”. Vendimi i KPA është përfundimtar.
