Bledar Ibrahimi, 28 vjeç u arrestua nga forcat e Antiterrorit pas një urdhër-arresti të lëshuar nga Prokuroria italiane për akuzën e terrorizmit. Ibrahimi u dëbua tre vjet më parë nga Italia në Shqipëri.
Një 28-vjeçar nga Elbasani u arrestua të martën nga Policia e Shtetit, pasi është shpallur në kërkim nga drejtësia italiane për akuzën e pjesmarrjes në organizatë terroriste. Sipas njoftimit për shtyp të shpërndarë nga policia, Bledar Ibrahimi- i quajtur person me “rrezikshmëri të lartë shoqërore”, u ndalua me qëllim ekstradimin në Itali.
“Në vijim të punës për parandalimin e terrorizmit, si dhe për kapjen e personave të shpallur në kërkim ndërkombëtar për terrorizëm, strukturat e Drejtorisë së Antiterrorit në Policinë e Shtetit…finalizuan operacionin për kapjen e një personi me rrezikshmëri të lartë shoqërore,” thuhet në njoftimin e policisë.
Arrestimi i 28-vjeçarit Ibrahimi u përshëndet edhe nga ministri i Brendshëm italian, Matteo Salvini përmes një postimi në Facebook.
“Në shtëpinë e tij në Milano u gjetën materiale informatike, gjurmë të kontakteve me fondamentalistë islamikë dhe dokumente video/fotografi që lavdërojnë xhihadin,” shkroi Salvini në Facebook. “Asnjë lëshim kriminelëve dhe fanatikëve që e sjellin luftën në shtëpi,” shtoi ai.
Sipas të përditshmës italiane “Corriere della Sera”, Bledar Ibrahimi ka mbërritur në Itali në moshën 20 vjeçare dhe është vendosur në komunën Pozzo D’Adda në Lombardi. Sipas të njëjtit artikull, Ibrahimi kishte krijuar miqësi me një rrjet mbështetësish të ISIS në Lombardi.
Në vitin 2014, Ibrahimi raportohet të ketë shkuar në Egjipt bashkë me familjarë të tij për të kryer studime fetare, prej nga u kthye në Itali në shkurt të vitit 2016.
Me urdhër të një gjykate italiane, Ibrahimi u dëbua në Shqipëri në vitin 2016. Megjithatë, çështja e tij në Itali është riaktivizuar sërish në mars 2019, përmes një urdhër-arresti të lëshuar nga prokuroria italiane, e cila po e heton për veprat penale të
“pjesëmarrje në organizatë terroriste,” parashikuar nga neni 270 i Kodit Penal Italian.