Një minator vdiq, ndërsa një tjetër u helmua nga shpërthimi i gazit në një galeri kromi në minierën e e Tërnovës në Bulqizë.
Një minator vdiq i asfiksuar ndërsa një tjetër u lëndua, pas çlirimit të gazit në një prej galerive të minierave në Tërnovë të Bulqizës. Policia njoftoi se aksidenti ndodhi rreth orëve të mesditës së sotme, ndërsa bëri me dije se minatori i plagosur është jashtë rrezikut për jetën. Policia nuk ka bërë me dije se cila kompani kontrollonte galerinë ku ndodhi shpërthimi.
Sipas policisë “ka humbur jetën shtetasi Fadil Stojku 50 vjeç dhe është plagosur shtetasi Lejtim Ramçi 47 vjeç, i cili ka marrë ndihmën mjekësore në spitalin e Bulqizës, ku mjekët konfirmuan se gjendja e tij shëndetësore është jasht rrezikut përjetën”.
Dëshmitarë në vendngjarje i thanë BIRN se shkak i dëmtimit të minatorëve ka qenë shpërthimi i gazit helmues i përhapur pas plasjes së minave në frontin e punës të galerisë së kromit.
Policia njoftoi se menjëherë është ngritur grupi hetimor i cili ka shkuar në vendngjarje, për dokumentimin dhe zbardhjen e plotë të rrethanave. Dyshimet paraprake janë se ngjarja ka ardhur si pasojë e shpërthimit të gazit në minierë.
Ky është aksidenti i dytë me vdekje i një minatori në Bulqizë këtë vit. Siguria në punë në galeritë e nxjerrjes së kromit ëhstë prej vitesh shqetësim, ndërsa masat e pretenduara prej autoriteteve nuk kanë sjellë përmirësime të dukshme.
BIRN në shkrime të mëparshme ka zbuluar se hetimet rreth aksidenteve në miniera mbylleshin pa fajtorë ose duke ua lënë fajin viktimave.
