Dy vëllezër dhe një i afërm i tyre u shpallën në kërkim nga policia si të dyshuar për vrasjen e dy kushërinjve Jushi në Laç.
Dy vëllezër dhe një i afërm i tyre u shpallën në kërkim të hënën nga policia si të dyshuar për vrasjen e dy kushërinjve Jushi në Laç. Policia njoftoi se vëllezërit Bushi 25 dhe 23 vjeç dhe një i afërm i tyre i identifikuar si V.Bushi 27 vjeç ishin shpallur në kërkim si autorë të dyshuar të vrasjes së Mikel dhe Jani Jushit.
Ngjarja ndodhi mbrëmjen e të dielës në Laç. Policia njoftoi se viktimat dhe të dyshuarit si agresorë ishin përplasur në një lokal ndërsa sherri ka vijuar edhe në rrugë. Dëshmitarë në vendngjarje thanë se të dyshuarit kanë ndjekur viktimat për disa metra në rrugë dhe i kanë qëlluar disa herë.
Dy kushërijtë sipas policisë mbetën të plagosur rëndë dhe u dërguan në një spital privat në Tiranë për ndihmë të specializuar, por ndërruan jetë dia orë më vonë si pasojë e plagëve që morën.
Në lidhje me ngjarjen policia tha se shoqëroi 23 persona të cilët u morën në pyetje. Po ashtu policia tha se sekuestroi edhe kamerat e sigurisë të lokalit ku ka nisur konflikti.
“Me mbështetjen e FNSH, janë kryer një sërë kontrollesh në banesa e vende të dyshimta ku mund të ishin fshehur autorët, si dhe janë shoqëruar në Komisariatin e Policisë, 23 persona të cilët u pyetën në lidhje me ngjarjen”, thuhet në një njoftim të policisë.
Sipas të dhënave 2 nga autorët e dyshuar të ngjarjes M.Bushi dhe V.Bushi janë përsona me precedetë të mëparshem penal.
M.Bushi ishte i shpallur në kërkim, pasi akuzohet se në vitin 2012 së bashku D.Shytin grabitën disa vajza që po shkonin në Kishën e Laçit dhe plagosën njërën prej tyre. Për këtë ngjarje gjykata e ka dënuar atë në mungesë.
V.Bushi po ashtu ka qenë i arrestuar për armëmbajtje pa leje dhe është dënuar në 2017 për armëmbajtje pa leje, ndërsa është liruar dhe ishte në shërbim prove. Ai ishte dënuar me 6 vite burg, por për shkak të gjykimit të shkurtuar masa e dënimit u ul dhe 2 vitet që i mbetën iu lanë në shërbim prove.
