Testi aritmetik-logjik i pasurisë së deklaruar i nxjerr një vit të karrierës me probleme kryetares së bashkisë Ura Vajgurore, Juliana Memaj.
Juliana Memaj u zgjidh në vitin 2015 në krye të bashkisë Ura Vajgurore si përfaqësuese e Partisë Socialiste me mbështetjen e Aleancës për Shqipërinë Europiane.
E diplomuar si juriste dhe ekonomiste, Memaj ka një karrierë të gjatë në administratën publike qendrore dhe vendore. Ajo ka punuar si Këshilltare e Ministres së Shtetit për Marrëdhëniet me Parlamentin, në Avokaturën e Shtetit, në Drejtorinë e Postave dhe në studion e saj ligjore private.
Përpara se të zgjidhej kryetare, Memaj ka punuar si juriste në bashkinë e Urës Vajgurore, inspektore pranë zyrës juridike të qarkut Berat si dhe këshilltare ligjore me kohë të pjesshme në disa ish-komuna. Gjithashtu, ajo ka qenë anëtarë e disa bordeve vendore. [lexo CV-në].
Në zgjedhjet vendore të vitit 2015-të, Memaj siguroi fitoren në bashkinë e Urës Vajgurore duke marrë mbështetjen e 58.28 % të votuesve.
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasurinë e të kryetares së bashkisë së Urës Vajgurore në prag të zgjedhjeve vendore të 30 qershorit.
Skeda grafike e mëposhtme paraqet pasurinë familjare të deklaruar nga kryebashkiakja Memaj nga viti 2014 deri në 31 dhjetor të vitit 2017. [kliko këtu për skedën në pdf]
Ne deklaratën e depozituar në ILDKPKI para fillimit të detyrës, kryebashkiakja e Urës Vajgurore regjistronte një pasuri familjare prej 1.8 milionë lekësh. Në fund të vitit 2017, pasuria e deklaruar e subjektit ka arritur një vlerë prej gati 5.7 milionë lekë, duke regjistruar një rritje mesatare vjetore prej 1.3 milionë lekë.
Kjo pasuri përbëhet nga likuiditete në bankë me vlerë 3.7 milionë lekë dhe pasuri të paluajtshme me vlerë 1.9 milionë lekë.
Pasuria e paluajtshme familjare e subjektit përbëhet nga 1/6 e pronësisë së një shtëpie banimi në Sarandë me vlerë 1.4 milionë lekë dhe ½ e 1672 m2 tokë më vlerë 400 mijë lekë. Znj, Memaj përpara se të bëhej kryebashkiake ka zotëruar aksione në një kompani për mbarështimin e gjedhit –Amaltea Sh.p.k , të cila ia ka shitur të vjehrrit në vitin 2015-të për shumën simbolike 25 mijë lekë.
Gjatë viteve 2014-2017, subjekti ka pasur të ardhura familjare në vlerën 9 milionë lekë, të cilat vijnë si rrjedhojë e pagës për shkak të funksionit dhe pagës së bashkëshortit.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit.
Kontrolli aritmetik-logjik krahason të dhënat financiare familjare si dhe informacione të tjera me deklarimet e mëparshme, për të “identifikuar të dhëna mbi të ardhura ilegale të fshehura” në transaksionet e kryera nga politikanët, sipas manualit të Këshillit të Europës për analizimin e të ardhurave dhe aseteve të zyrtarëve publikë.
Me fjalë të tjera, ky kontroll shpjegon nëse paratë që politikani deklaron se ka përfituar përputhen me asetet dhe paratë e shpenzuara prej tij.
Mospërputhjet mes të ardhurave në hyrje dhe shpenzimeve të kryera nuk janë domosdoshmërisht të paligjshme. Megjithatë, këto mospërputhje ngrenë “flamuj të kuq”, që normalisht kërkojnë verifikime të thelluara nga Inspektoriati i Lartë i Deklarimit dhe Kontrollit të Pasurive dhe Konfliktit të Interesit.
Nga katër deklarata e kryebashkiakes Memaj të analizuara nga BIRN, për një vit u konstatuan probleme në kontrollin aritmetik-logjik. Shuma e pajustifikuar rezulton 1,082,774 lekë, pa llogaritur në këtë analizë shpenzimet e konsumit familjar.
Përveç kontrollit aritmetik-logjik, BIRN bërë dhe skanimin cilësor të deklaratave të subjektit dhe zbuloi probleme që sipas standardeve ndërkombëtare cilësohen si flamujt të kuq dhe duhet të shtynin ILDKPKI-në për të ndërmarrë një hetim administrativ të plotë.
Në vitin 2017 bashkëjetuesi i subjektit ka deklaruar: lidhjen e një kontrate sipërmarrje me datë 07.09.2017, pas revokimit me datë 06.09.2017 të kontratës datë 25.03.2011, ndryshim midis vlerës së kontratës 950 euro. Nga ky deklarim, konstatohet se kontrata e datës 25.03.2011 nuk është deklaruar në vitet e mëparshme, si rrjedhojë dhe të ardhurat e krijuara nga revokimi i kontratës e të depozituara pjesërisht në Bankën Intesa San Paolo, janë të pa justifikuara për vitin. Nga ana tjetër nuk ka të dhëna për objektin e kontratës së sipërmarrjes datë 07.09.2017.
Deklarata para fillimit të detyrës
Deklarata e pasurisë për vitin 2015
Deklarata e pasurisë për vitin 2016
Deklarata e pasurisë për vitin 2017
Për më shumë dokumente vizitoni databazën tonë dokumente.reporter.al
