Kryetari i Bashkisë së Peqinit, Saimir Hasalla, i cili përfaqëson Partinë Për Drejtëesi, Integrim dhe Unitetit deklaron pasuri me vlerë 3.4 milionë lekë. Saimir Hasalla u zgjodh kryetar i bashkisë së Peqinit në zgjedhjet lokale të vitit 2015, si përfaqësues i Partisë për Drejtësi, Integrim dhe Unitet, i mbështetur nga koalicioni “Aleanca për Shqipërinë Europiane”. Hasalla u përfshi në politikën lokale pas një eksperience të shkurtër si këshilltar i grupit parlamentar të PDIU-së në Kuvend.
Kryebashkiaku i Peqinit ka mbaruar studimet në fakultetin juridik në Tiranë në vitin 2009. Ai ka punuar si jurist fillimisht në zyrën arsimore të Peqinit dhe më pas në burgjet e Rrogozhinës, Vlorës dhe Peqinit.
Ky raport është prodhuar nga BIRN pas administrimit të deklaratave të pasurisë së kryetarit të Bashkisë së Peqinit nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryebashkiakëve të vendit në prag të zgjedhjeve vendore të 30 qershorit.
Skeda grafike e mëposhtme paraqet pasurinë e deklaruar nga kryebashkiaku i Peqinit, Saimir Hasalla nga viti 2014 deri në fund të vitit 2017. [Kliko për skedën në PDF].
Z.Hasalla zotëronte pasuri me vlerë 3.2 milionë lekë në vitin 2014, kur deklaroi për herë të parë interesat e tij private në ILDKPKI. Referuar deklaratës së tij, ai zotëronte 25% të një shtëpie banimi prej 140 m2 në Peqin si dhe një automjet me vlerë 200 mijë lekë.
Në fund të vitit 2017, pasuria e kryebashkiakut të Peqinit është 3.4 milionë lekë. Sipas të dhënave të analizuara, ai zotëron të njëjtën shtëpi si më parë, ka shitur automjetin e tij si dhe ka dhënë një hua prej 400 mijë lekësh.
Të ardhurat për periudhën deklaruese janë 3.4 milionë lekë dhe burojnë të gjitha nga paga e tij për shkak të funksionit.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 4 deklarata të Z.Hasalla, të cilat rezultuan pa probleme.
BIRN identifikoi si “flamur të kuq” në këtë analizë huadhënien prej 400 mijë lekësh që kryebashkiaku i Peqinit deklaron se ka dhënë në vitin 2016. Kjo hua ka si burim një kredi bankare prej 1 milion lekësh që Z.Hasalla ka marrë me qëllim arredimin e shtëpisë në Peqin.
Duke qenë se ky raport bazohet në të dhëna statistikore të analizuara nëpërmjet një databaze, ai nuk nxjerr përfundime mbi pasurinë e subjektit nëse ajo është e ligjshme ose jo, por mëton të informojë publikun mbi pasurinë e deklaruar të zyrtarit publik nëpërmjet një formati të thjeshtë dhe të kuptueshëm grafik.
Deklarata e pasurisë Para Fillimit të Detyrës
Deklarata e pasurisë së vitit 2014
Deklarata e pasurisë për vitin 2015
Deklarata e pasurisë për vitin 2016
Deklarata e pasurisë për vitin 2017
Për më shumë dokumente vizitoni databazën tonë dokumente.reporter.al