Ambasada e Shteteve të Bashkuara në Tiranë i bëri thirrje të hënën krerëve të opozitës të distancohen nga dhuna dhe të flasin publikisht kundër saj, pak orë para protestës së radhës të opozitës kundër qeverisë “Rama”.
Ambasada e Shteteve të Bashkuara të Amerikës i kërkoi publikisht të hënën krerëve të opozitës të dënojnë dhunën ndërsa theksuan se protestat janë thelbësore për demokracinë.
“Ne iu bëjmë thirrje udhëheqësve të opozitës, veçanërisht Kryetarit të Partisë Demokratike, Lulzim Basha dhe Kryetares së Lëvizjes Socialiste për Integrim, Monika Kryemadhi, që të dënojnë publikisht veprimet e dhunshme të mbështetësve të tyre, të bashkëpunojnë me çdo hetim që synon të identifikojë çdo person që i kreu ato dhe vënien e tyre përpara përgjegjësisë, si dhe të sigurojnë që të gjitha protestat e ardhshme publike të jenë të qeta dhe paqësore,” thuhet në një deklaratë të publikuar pak orë para nisjes së protestës së rradhës të opozitës të planifikuar për orën 6.30 të pasdites së sotme (e Hënë 13 maj).
Ambasada dënoi gjithashtu dhunën e shënuar në protestën e të shtunës, më 11 maj, kur një numër bombash molotov u hodhën kundër ndërtesës së kryeministrisë si dhe kryesisë së kuvendit dhe ndërtesës së seancave plenare të kuvendit. Shumica e bombave molotov u përplasën me murin e kryeministrisë, por së paku dy prej tyre shpërthyen në mes të kordonit policor.
Protesta vijoi me përleshje deri në orët e vona të natës.
“Ne dënojmë dhunën e pranishme gjatë protestave të 11 majit në Tiranë dhe përgjegjësit e saj. Dhuna çoi në plagosje dhe dëmtime të pronës, përfshirë edhe dëmtim të vendbanimit së Ambasadorit të OSBE-së. Këto veprime të dhunshme ishin të paligjshme dhe jodemokratike,” thuhet në deklaratën e ambasadës amerikane.
“Protestat paqësore janë thelbësore për demokraci të shëndetshme dhe e drejta e qytetarëve për t’u mbledhur dhe për të protestuar kundër qeverisë së tyre është themelore. Megjithatë, forca dhe dhuna nuk kanë vend në një proces demokratik,” shton më tej deklarata.
Në vijim të dhunës së shënuar të shtunën, kryeministri Edi Rama u shpreh i hapur për bisedime me opozitën ndërsa kryetari demokrat Lulzim Basha përsëriti kërkesën për dorëheqjen e Ramës.
Edhe Ambasada e SHBA bëri thirrje për bisedime.
“Shtetet e Bashkuara nxisin të gjitha palët që të zmbrapsen nga përplasjet dhe të përfshihen në një dialog konstruktiv, që synon t’i japë fund ngërçit politik,” thuhet në deklaratë.
