Pasuria e deklaruar e kryetarit te bashkisë Mat, Nezir Rizvani ka shënuar luhatje minimale gjatë kohës që ai ka qenë subjekt deklarimi pranë ILDKPKI.
Nezir Rizvani u zgjodh kryetar i bashkisë Mat në vitin 2015-të si përfaqësues i Partisë Demokratike – i mbështetur nga Aleanca për Punë dhe Dinjitet, me 50.55 % të votave.
I diplomuar në Fakultetin Ekonomik të Universiteti të Tiranës, Rizvani ka mbajtur disa poste drejtuese ne industrinë e kromit në rajonin e Matit nga viti 1998 deri në vitin 2001. Nga viti 2001 deri në vitin 2015-të ai ka punuar is person fizik i regjistruar më profesion kontabël i miratuar në rrethin e Matit.
Ai është anëtar i Partisë Demokratike nga viti 1991 e në vazhdim. Në Vitet 1997 – 2001 ai ka mbajtur postin e sekretar i grup-seksionit P.D-së në bashkinë Burrel, Në vitet 2001- 2006 ai ka qenë sekretar i degës PD-së në Mat dhe në vitet 2006 – 2009 kryetar i degës së PD-se Mat. Nga muaji shkurt 2015 e në vazhdim ai ka shërbyer si sekretar i degës PD-së në Mat. Nga viti 1992 e deri në vitin 2011, Rizvani ka mbajtur disa poste në pushtetin vendor, si anëtar i këshillit të rrethit Mat, kryetar i Këshillit Bashkiak Burrel, anëtar i Këshillit të Qarkut Dibër dhe nën-kryetar i Këshillit të Qarkut Dibër.
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve të bashkive të vendit në prag të zgjedhjeve lokale të 30 qershorit.
Skeda grafike e mëposhtme paraqet pasurinë familjare të deklaruar nga kryebashkiaku Rizvani nga viti 2015 deri në fund të vitit 2017. [kliko këtu për pdf]
Në deklaratën përpara fillimit të detyrës në vitin 2015-të, subjekti deklaron një pasuri familjare prej 10.1 milionë lekë. Në fund të vitit 2017 pasuria familjare e subjektit është rritur vetëm me 28984 lekë.
Kjo pasuri përbëhet në fund të vitit 2017 nga 8.3 milionë lekë pasuri të paluajtshme, e cila përfshin një apartament 51.6 m2, të blerë për 520 mijë lekë në vitin 1995 nga Enti Kombëtar i Banesave, një apartament me vlerë 49530 euro të blerë në vitin 2012 dhe një garazh me vlerë 7510 euro. Gjithashtu, subjekti ka pasur 1.4 milionë likuiditete në cash dhe 395 mijë lekë në bankë.
Gjatë periudhës së deklarimit 2015-2017 subjekti ka pasur 3.7 milionë lekë të ardhura të deklaruara, nga të cilat 98% vijnë nga paga për shkak të funksionit dhe paga e bashkëshortes.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq' që identifikohen gjatë kontrollit. BIRN kreu kontrollin aritmetik/logjik për 3 vite deklarimi të cilat rezultuan pa probleme.
Deklarata para fillimit të detyrës
Deklarata e pasurisë e vitit 2015
Deklarata e pasurisë e vitit 2016
Deklarata e pasurisë e vitit 2017
Për më shumë dokumente vizitoni databazën tonë dokumente.reporter.al