Kryebashkiaku i Fushë-Arrëzit, Fran Tuci zotëron pasuri me vlerë 13.1 milionë lekë, por nuk ka deklaruar pranë ILDKPKI-së aksionet e zotëruara në një kompani biznesi.Fran Tuci u zgjodh kryetar i Bashkisë Fushë-Arrëz në zgjedhjet lokale të vitit 2015, si përfaqësues i Partisë Socialiste dhe i Aleancës për Shqipërinë Europiane. Ai e fitoi mandatin me 50.62% të votave.
Fran Tuci nuk ka publikuar një CV në faqen zyrtare të Bashkisë Fushë-Arrëz. Por ai u përfshi në politikën lokale pas aktivitetit të tij në biznes privat. Të dhënat në Qendrën Kombëtare të Bizneseve tregojnë se Tuci ka themeluar në vitin 2000 kompaninë e sigurisë fizike “Kristal A”, aksionet e së cilës i ka shitur në vitin 2009.
Ai ka themeluar një kompani të dytë, “Tuci ZD” sh.p.k në vitin 2015 me aktivitet në shërbime dhe tregti. Kryebashkiaku zotëron 100% të kuotave, ndërkohë që kompania administrohet nga i vëllai. [Shiko ekstraktin në QKB]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit, në prag të zgjedhjeve lokale të 30 qershorit.
Skeda grafike e mëposhtme paraqet pasurinë e deklaruar nga kryetari i Bashkisë Fushë-Arrëz nga viti 2015 deri në fund të vitit 2017. [Kliko për skedën në PDF]
Kryetari i Bashkisë Fushë Arrëz zotëronte pasuri me vlerë 13.1 milionë lekë në vitin 2015, kur deklaroi për herë të parë interesat e tij private në Inspektoriatin e Lartë të Deklarimit dhe Kontrollit të Pasurive.
Në fund të vitit 2017, pasuria familjare e tij rezulton thuajse e pandryshuar. Pasuria e patundshme llogaritet në 11.5 milionë lekë dhe përbëhet nga tokë bujqësore me sipërfaqe personale ndërtimi prej 120 m2, tokë bujqësore në Hamallaj Durrës si dhe një Bar-kafe e blerë në vitin 1998 për 70 mijë marka.
Ai deklaron gjithashtu automjete me vlerë 1.4 milionë lekë dhe 238 mijë lekë likujditete bankare. Z.Tuci nuk deklaron në ILDKPKI zotërim kuotash kapitali, ndonëse sipas QKB-së ai zotëron 100% të aksioneve të kompanisë “Tuci ZD” me kapital 350 mijë lekë.
Të ardhurat familjare për periudhën deklaruese janë 9.7 milionë lekë me burim të vetëm pagën e Z. Tuci nga funksioni i kryebashkiakut.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 3 vite të deklarimit, të cilat rezultojnë pa probleme.
Megjithatë, në analizën cilësore të deklaratave u identifikuan “flamuj të kuq”, të cilët lidhen me pronësinë e një sipërfaqeje toke në Hamallaj të Durrësit si dhe me një hua.
Më konkretisht, kryetari i Bashkisë Fushë-Arrëz deklaron pronësinë mbi 4800 m2 tokë në Hamallaj të Durrësit, në proces legalizimi. Nga mënyra e deklarimit të kësaj pasurie, është e paqartë se si është përfituar toka në fjalë.
Gjithashtu në vitin 2017, Z.Tuci deklaron një hua prej 500 mijë lekësh, të cilët rezulton ta ketë shlyer brenda vitit.
Deklarata e pasurisë Para Fillimit të Detyrës
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al
