Të pandehurit e pranishëm dhe avokatët e tyre kërkuan përjashtimin e trupit gjykues dhe braktisën sallën, ndërkohë që gjykata i penalizoi me gjobë dhe i zëvendësoi me avokatë kryesisht.
Pas nëntë seancash të shtyra, Apeli për Krimet e Rënda arriti të formonte trupën gjykuese për të nisur shqyrtimin e çështjes së Emiljano Shullazit dhe katër të pandehurve të tjerë të dënuar në shkallë të parë për gjobëvënie në kuadër të grupit të strukturuar kriminal.
Megjithatë seanca u shty sërish, pas debateve të shkëmbyera mes të pandehurve, avokatëve të tyre dhe kryesueses së trupës gjyqësore, Saida Dollani.
Kur kryesuesja e trupës gjykuese, Saida Dollani verifikoi prezencën e palëve, përfaqësuesi ligjor i të pandehurit Gilmando Dani, avokati Denion Bogdani pretendoi se nuk ishte njoftuar nga trupa gjykuese.
Ai pretendoi se për shkak se gjatë seancës parardhëse trupa gjykuese nuk ishte e formuar, nuk mund të merrej vendim për njoftimin e seancës dhe se njoftimi duhej të ishte kryer edhe për të me fletë-thirrje.
Gjyqtarja Dollani bëri me dije se ishin njoftuar për nisjen e procesit gjyqësor në Apel, edhe pesë personat që janë në cilësinë e “viktimës” në këtë çështje, Ylvi Beqja, Adriatik Kërçuku, Mynyr Koni, Dhori Kule dhe Jani Zaka.
Lidhur me këtë fakt, kontestime pati edhe nga prokurori i Apelit për Krime të Rënda, Isa Jata i cili ngriti dyshime se firma e Ylvi Beqes nuk ishte e tija, por e një personi tjetër.
“Beqja ka statusin e dëshmitarit të mbrojtur dhe për këtë arsye mund të firmosë edhe kontakti i tij,” sqaroi kryesuesja e trupës gjykuese.
Kontestimet për njoftimin e të dëmtuarve u shtynë përpara nga avokatët e pesë të pandehurve. “Të shqetësuar” për dërgimin e fletë-thirrjeve në adresa të vjetra apo për mungesën e të drejtave të viktimave në fletë-thirrje, avokatët i cilësuan ato të parregullta.
Pas debateve fillestare, kryesuesja Dollani deklaroi trupën gjykuese të përbërë përveç saj edhe nga Albana Boksi dhe Valdete Hoxha, e caktuar pak ditë më parë nga KLGJ.
Por anëtarja e re e trupës gjykuese u kontestua nga avokati Vladimir Meçi.
“Nuk kemi ndonjë gjë personale me gjyqtaren Valdete Hoxha, pork a marrë pjesë në një çështje penale ku kërkues ka qenë Ylvi Beqja,” tha Meçi në seancë.
Edhe avokati Bogdani mbajti të njëjtin qëndrim, duke kujtuar rastet e dorëheqjeve të gjyqtarëve të tjerë të Apelit të Krimeve të Rënda për të njëjtat situata. Ai paralajmëroi dorëzimin e një kërkese për përjashtimin e të gjithë trupit gjykues. I njëjti refren u përsërit edhe nga avokatët e tjerë, të cilët kërkuan përjashtimin e kryesueses apo të të gjithë trupës gjyqësore për njëanshmëri.
Pasi dëgjoi pretendimet e mbrojtjes, kryesuesja Dollani u shpreh se gjyqtarja Valdete Hoxha kishte kërkuar vetë dorëheqjen, por zv.kryetarja e Gjykatës së Krimeve të Rënda e kishte rrëzuar kërkesën.
Gjyqtarja Dollani i dha fjalën të pandehurit Gilmando Dani, i cili nuk u përgjigj për çfarë iu kërkua por e pyeti atë në lidhje me publikimin në media të kërcënimit të saj.
“Keni mbushur opinionin publik se ju kemi kërcënuar ju dhe burrin. A mund të më japësh një përgjigje…, të paktën medias një përgjigje…, ju si relatore,” tha ai.
Kryesuesja Dollani i tërhoqi vëmendjen Danit, por ai shtoi se ajo e kishte paragjykuar. Dollani caktoi 30 mijë lekë gjobë për të pandehurin Dani për fjalorin e përdorur me gjykatën dhe vendosi largimin e tij nga salla.
Teksa po dilte, i pandehuri Gilmando Dani u kërkoi avokatëve mbrojtës që të mos zhvillonin gjykim pa ata. Danin e kanë ndjekur edhe të pandehurit e tjerë. Pas të pandehurve lanë sallën edhe avokatët e tyre.
Gjykata vendosi të dënojë me nga 50 mijë lekë avokatët Vladimir Meçe, Denion Bogdani e Bledar Meminaj dhe me 10 mijë lekë avokatin Elton Domi. Gjithashtu vendosi të njoftojë për qëndrimin e tyre kryetarin e Dhomës së Avokatisë. Pasi përfaqësuesit ligjorë të të pandehurve u zëvendësuan me pesë avokatë kryesisht, gjykata vendosi të shtyjë seancën më datë 6 qershor, ora 13:30.