Prokurorja e Përgjithshme e Përkoshme, Arta Marku bëri një vesh shurdh ndaj rekomandimeve të komisionit të koordinimit dhe monitorimit të reformës në drejtësi, duke shkelur frymën e ligjit me procedurat e zgjedhjes së anëtarit të ri të KLP-së, Vatë Staka.
Komisioni i Pavarur për Koordinimin, Monitorimin dhe Ndjekjen e Zbatimit të Ligjit “Për organet e qeverisjes së sistemit të drejtësisë”, ka hartuar një raport për periudhën nëntor 2018 – maj 2019, ku ndër të tjera evidenton problematikat proceduriale të zgjedhjes së anëtarit të ri të Këshillit të Lartë të Prokurorisë, Vatë Staka.
Në raport thuhet se nga ana e Prokurorisë së Përgjithshme, për këtë procedurë nuk është mbajtur parasysh rekomandimi i Komisionit të Pavarur për zgjedhjen me short të komisionit të votimit gjatë mbledhjes së përgjithshme të prokurorëve të datës 11 prill 2019, për plotësimin e vakancës në KLP.
Gjithashtu, Komisioni i Pavarur i Monitorimit thekson se nëse fleta e votimit duhet të jetë me patjetër vetëm me një emër kandidati, atëherë duhet të kishte dy mundësi ku mund të shënohej vullneti i zgjedhësit, “pro” ose “kundër”.
Në raport thuhet se ky sugjerimi nuk është marrë parasysh nga organi qendror i akuzës. Ndërkohë, shtohet se fryma e ligjit kërkon më shumë se një kandidat për zgjedhjet e anëtarëve të KLP-së.
Edhe pse në interpretimin e Komisionit të Pavarur nuk përjashtohet mundësia e një kandidati të vetëm, aty shpjegohet se miratimi i fletës së votimit me një kandidat të vetëm dhe me një kuti ku mund të shprehet vullneti i zgjedhësit, mund të interpretohet si një imponim i vullnetit të votuesit, duke e konsideruar si një cënim të së drejtës për të zgjedhur.
“Komisioni i Monitorimit, i mbetet përsëri rekomandimit që gjithësesi miratimi i modelit të fletës së votimit me një kandidat, duhet të bëhet me dy mundësi, ku mund të shënohet vullneti i zgjedhësit “pro” ose “kundër”,” thuhet në raport.
“Pavarësisht se numri i votave kundër nuk ndikon në zgjedhjen e kandidatit (sipas dispozitës në fuqi), një mënyrë e tillë votimi do të shprehë saktësisht vullnetin e zgjedhësve dhe do të shprehte saktësisht mbështetjet e tyre kundrejt kandidatit për KLP,” shton raporti.
Komisioni konstaton se mungesa e informimit për mënyrën e votimit solli si pasojë një numër të madh fletësh votimi të pavlefshme.
Mbledhja e përgjithshme e prokurorëve për zgjedhjen e anëtarit prokuror të Këshillit të Lartë të Prokurorisë, KLP, u zhvillua me debate mes Prokurores së Përgjithshme të Përkohshme, Arta Marku dhe prokurorit në Prokurorinë e Tiranës, Sokol Malaj – i cili në emër të 45 prokurorëve kërkoi ndryshimin e rregullores lidhur me zgjedhjen që do të kryhej.
Që në çelje të seancës, kur kryeprokurorja Arta Marku bëri me dije pjesëmarrjen e 229 prokurorëve në këtë mbledhje dhe sipas rendit të ditës ftoi kandidatin e vetëm, prokurorin Vatë Staka që të parashtronte platformën e tij, në foltoren e sallës shkoi prokurori Sokol Malaj, i cili në emër të një grupi kolegësh propozoi ndryshimin e nenit 18 të rregullores, duke kërkuar që zgjedhja të kishte elementin e konkurrencës. Ai kërkoi që në mungesë të më shumë se një konkurrenti, zgjedhja të kryhej me 50+1 % të votave duke theksuar se me rregulloren aktuale në këtë rast nuk mund të kishte zgjedhje, pasi gjithçka ishte paracaktuar dhe kandidati i vetëm mund të shpallej fitues edhe vetëm me votën e tij.
Por kjo kërkesë u rrëzua nga prokurorja e Përgjithshme e Përkohshme Arta Marku, e cila argumentoi se kërkesa kishte të bënte me fletën e votimit që sipas saj ishte miratuar para dy ditësh dhe se ishte ekskluzivitet i Prokurorit të Përgjithshëm. Ajo e cilësoi kërkesën e prokurorit Malaj në kundërshtim me frymën e ligjit
