Një valë tërmetesh përfshiu qarkun e Korçës. Katër persona u plagosën, ndërsa në fshatin Floq, i cili u identifikua si epiqendër, u shkatërruan 45 shtëpi. Ministria e Mbrojtjes bëri me dije se në total ishin dëmtuar më shumë se 100 banesa.
Fatmir Bekolli sapo ishte zgjuar mëngjesin e të shtunës rreth orës 6 të mëngjesit, kur ndjeu dridhjet prej tërmetit. Bekolli zgjoi në panik familjen dhe të gjithë rendën jashtë shtëpisë. “Muret nisën të çahen. Dolëm duke bërtitur, ndërsa pas shpinës ndieja copat e tavanit, suvatë që binin dhe dritaret që po thyheshin”, tha Bekolli për BIRN.
Jashtë burri pa që i gjithë fshati kishte dalë në rrugë, ndërsa para syve të tyre lëkundjet e tërmetit rrëzonin muret e shtëpive.
Lëkundjet e njëpasnjëshme deri në 5.3 të shkallës Rihter sipas të dhënave zyrtare nga Instituti i Gjeoshkencës, që u ndjenë kryesish në Juglindje të Shqipërisë, Selanik, Maqedoni të Veriut dhe Bullgari, filluan në orën 6.20 të mëngjesit të së shtunës.
Zyrtarisht u rregjistruan 4 tërmete të fuqishëm dhe dhjetra të tjera të një niveli më të ulët janë regjistruar prej orës 6.20 deri në mesditë duke shkatëruar në masë banesat ndërsa 4 persona janë lënduar si pasojë e materialeve që janë shkëputur nga tavanet dhe muret e banesave.
Fshati Floq i Korçës ku edhe janë shkaktuar dëmet më të mëdha, u identifikua si një prej epiqendrave të lëkundjeve sizmike që vijuan gjatë gjithë orëve të paradites.
Bekolli tha se ata kishin dalë jashtë kur ndjenë lëkundjen e dytë dhe dëgjuan që një nga fqinjët po thërrsite për ndihmë. “Djali 30 vjeç duke dalë nga shtëpia i kishte rënë e gjithë struktura e oxhakut mbi kokë. Për fatin e mirë ishte penguar tek tjegullat duke amortizuar disi pesëhën. Ai ishte dëmtuar në kokë, por na thanë nga spitali që ishte mirë”, tha Bekolli.
Ai thotë se vijimi i tërmeteve e detyroi të largonte fëmijët dhe prindërit. “Edhe tani lëkundet toka. Unë nuk e di pse po pres këtu tani që edhe shtëpia mu shkatërua”- tha Fatmir Bekolli.
Basel Bekolli, Ali Elezi, Miranda Pelivani dhe Armando Hasankolli janë 4 banorët e fshatit Floq, të cilët u dëmtuan teksa ishin duke dalë nga banesat e tyre dhe morën ndihmë mjekësore në Spitalin Rajonal të Korçës.
Ndërkohë 92 familje të këtij fshati u evakuan pas situatës së pazakontë të krijuar duke lënë pas shtëpitë e tyre dhe gjithçka kishin.
Prej mëngjesit të 1 qershorit, ata qëndruan në qiell të hapur, pa mundur të hyjnë në banesat e tyre, që janë shkatërruar ose kanë pësuar dëmtime.. Shumë prej banorëve u larguan mes panikut për tu strehuar tek të afërmit, të tjerë do të kalojnë natën në çadrat e ngritura nga Shtabi i Emergjencave.
“Nga informacioni i marrë deri tani nga Prefektura Korçë, Policia e Shtetit dhe nga Spitali Rajonal i qytetit Korçë informohemi: Banesa të evidentuara me çarje muresh, shembje çatie dhe shembje suvash deri tani në fshatin Floq dhe Dvoran janë 70 banesa. 50 banesa janë të vjetra dhe të pa banuara prej shumë vitesh. Në fshatin Qafëzezë janë të dëmtuara nga tërmeti 10 banesa. Në fshatin Vidohovë kanë pësuar çarje të mureve 20 banesa të vjetra”, bëri me dije dje në mesditë Ministria e Mbrojtjes.
Sipas zyrës së Emergjencave Civile banorëve u është dërguar ujë me autobot, ndërsa po ashtu një detashment i ushtrisë në Korçë është në dispozicion të tyre për të ngritur çadrat dhe ndihmuar.
Zona që u prek më rëndë përfshin fshatrat e Korçës, por dëme janë rregjistruar edhe në bashkinë Kolonjë. 3 banesa në fshatin Qafzez kanë pësuar dëmtime të konsiderueshme ndërsa OSHEE Kolonjë konstatoi se ka çarje të mureve dhe rrezik shembjeje te kabinave elektrike në disa prej fshatrave një pjesë e të cilëve ishin pa energji elektrike.
Banorët treguan se tërmete të përmasave të tilla nuk ishin shënuar në Korçë prej vitit 1960 kur edhe ishin shkaktuar dëme kolosale.