Prokuroria e Krimeve të Rënda ka mbyllur hetimet për 51 të akuzuarit për trafikim të qenieve njerëzore drejt Mbretërisë së Bashkuar, SHBA-ve dhe Kanadasë dhe ka dërguar çështjen për gjykim.
Prokuroria për Krime të Rënda ka përfunduar hetimet ndaj një grupi të strukturuar kriminal të kontrabandimit të qenieve njerëzore, të shtrirë në disa shtete dhe kontinente dhe ka dërguar në Gjykatë kërkesën për gjykimin e 51 të akuzuarve.
Sipas kërkesës për gjykim të bërë publike nga Prokuroria, rrjeti i mësipërm e kishte shtrirë aktivitetin e tij jashtë territorit të Shqipërisë; në Maqedoni, Bullgari, Kosovë Slloveni, Itali, Spanjë, Portugali, Francë, Irlandë deri në vendet e Amerikës Latine.
Të pandehurit akuzohen se u jepnin ndihmë për kalim të paligjshëm të kufirit kundrejt pagesës shtetasve që dëshironin të emigronin në mënyrë të paligjshme në Irlandë, Britaninë e Madhe, Shtetet e Bashkuara të Amerikës dhe në Kanada. Të përfshirë në këtë rrjet të trafikimit janë edhe dy efektivë policie.
Nga hetimet ka rezultuar se grupi kishte në përbërje të tij shtetas shqiptarë, maqedonas e bullgarë, të cilët kishin një hierarki të përcaktuar për rolet dhe detyrat që kryenin. Konkretisht, disa prej anëtarëve të grupit siguronin kontaktet me personat e interesuar për të emigruar në mënyrë të paligjshme në drejtim të Mbretërisë së Bashkuar, ShBA dhe Kanada; disa ishin garantë dhe mbajtës të vlerave monetare që paguheshin nga të interesuarit, ndërsa të tjerë siguronin rezervimet e udhëtimeve dhe akomodimin.
Sigurimi dhe prodhimi i dokumenteve të falsifikuara kishte gjithashtu një rol qendror në kontrabandimin e njerëzve.
Nga hetimi dy vjeçar i drejtuar nga prokurori Eugen Beçi është konkluduar se personat që kërkonin të shkonin jashtë shtetit në mënyrë të paligjshme paguanin nga 7000 deri në 9000 paund për të arritur në Mbretërinë e Bashkuar dhe 25 deri në 30 mijë dollarë për në ShBA e Kanada. Pasi merrnin të dhënat personale të këtyre personave, anëtarët e grupit kujdeseshin të prodhonin dokumentet e falsifikuara, ndërsa paralelisht me këtë kryeshin rezervimet e linjave të udhëtimit, ajrore dhe tokësore, vajtje–ardhje, që në shumicën e rasteve kanë rezultuar të jenë fiktive.
Hetuesit kanë zbuluar se personat që do të emigronin udhëtonin fillimisht me dokumenta shqiptare deri në vendet e Bashkimit Europian, duke shfrytëzuar lëvizjen e lirë. Për të mbërritur në Mbretërinë e Bashkuar si pikënisje ishin kryesisht Franca, Spanja dhe Italia, kurse për të emiguruar në mënyrë të paligjshme në drejtim të SHBA-ve dhe Kanadasë, janë përdorur si shtete transit Meksika, Panamaja si edhe Republika Domenikane.
Në kërkesën për gjykim thuhet se në bashkëpunim me drejtësitë e vendeve partnere është arritur të parandalohen dhe të kapen brenda një viti mbi 200 raste të tentativave për emigrim të paligjshëm nëpërmjet dokumenteve të falsifikuara. Paralelisht me hetimin e kryer në Shqipëri, janë regjistruar procedime edhe në Maqedoni, Bullgari, Spanjë, Francë e Angli.
Pas finalizimit të operacionit të koduar “One if by Land” më 18 Mars të vitit 2018, Gjykata e Shkallës së Parë për Krimet e Rënda, Tiranë ka caktuar masën e sigurimit “arrest me burg” për 51 shtetas shqiptarë të implikuar, nga të cilët janë ekzekutuar 39 të tillë dhe 12 shtetas janë shpallur në kërkim, thuhet në kërkesën për gjykim.
Nga hetimet e kryera në vazhdimësi, Prokuroria ka ngritur dyshime edhe për përfshirjen e pesë shtetas maqedonas dhe tre shqiptarë, dy prej të cilëve punonjës policie.
Të arrestuar:
Ardian Corri
Luan Qyryku
Eno Muçollari
Ardian Gurakuqi
Zaim Hysenbelliu
Arben Kajaçi
Genci Osmanaj
Oltjan Serani
Tanush Prenga
Liri Muçollari
Fuat Zaimi
Nikolin Priska
Ylber Rama
Haki Tarja
Bedri Bendaj
Erenik Avduli
Nike Bushi
Kolë Vushaj
Besnik Vuçaj
Alfred Kalaj
Mhill Zefi
Nosh Volaj
Prel Gjelaj
Sokol Duli
Euglen Dushku
Leonora Dushku
Roza Frroku
Blerim Brahimi
Luigj Shtinja
Esat Cakoni
Fatos Muja
Kreshnik Muja
Artur Karaj
Kristjan Zallinaj
Mensur Selami
Në kërkim:
Bashkim Sorra
Ilir Feçi
Sajmir Hysenbelliu
Enxhi Koçi
Përparim Kule
Skënder Koçi
Shkëlqim Koçi
Adriatik Çekaj
Jorgo Shaho
Borislav Krumov
Marin Vasilev