Asnjë prej avokatëve të caktuar kryesisht nga gjykata nuk u paraqitën në seancën e apelit për krimet e rënda ndaj grupit që u dënua në shkallën e parë me 55 vite burg.
Mungesa e avokatëve të caktuar kryesisht solli moszhvillimin e seancës gjyqësore të apelit ndaj grupit të Emiljano Shullazit dhe shokëve të tij të enjten më 6 qershor në Tiranë. Kjo ishte hera e 11 që seanca e pritshme në Gjykatën e Apelit për Krimet e Rënda të mos zhvillohej sipas planit.
Gjatë seancës të zhvilluar të enjten nuk morën pejsë as avokatët e zgjedhur prej vetë të pandehurve të dënuar në shkallë të parë për gjobëvënie në kuadër të grupit të strukturuar kriminal. Ndërkohë, ishin prezentë të pandehurit Gilmando Dani, Blerim Shullazi, Endrit Zela dhe Endrit Qyqja, ndërsa mungonte Emiljano Shullazi, i cili kishte dorëzuar në gjykatë deklaratë se do të përfaqësohej nga avokati i tij mbrojtës Vladimir Meçe. Gjatë kësaj seance nuk u paraqitën as dëshmitarët.
Kryesuesja e trupës gjykuese, Saida Dollani, pasi kreu verifikimin e prezencës së palëve, njoftoi ndryshimin e trupës gjyqësore, pas pranimit të kërkesës për dorëheqje të gjyqtares Valdete Hoxha. Sipas Dollanit, Këshilli i Lartë Gjyqësor e ka zëvendësuar gjyqtaren Hoxha me kolegen e saj Etleva Temo dhe anëtarja e tretë vazhdon të jetë gjyqtarja Albana Boksi. Dollani sqaroi se nuk ishte arritur të njoftoheshin tre prej avokatëve të caktuar kryesisht, ndërsa për dy ndaj tyre u caktua gjobë në vlerën e 5 mijë lekëve, pasi justifikimet u konsideruan si të papërligjura.
Prokurori i çështjes, Isa Jata u shpreh se në kushtet kur mungonin mbrojtësit e të pandehurve, ishte e pamundur që të zhvillohej seanca. Por, ai kërkoi pezullimin e afateve të paraburgimit duke cilësuar si shkak të shtyrjes së seancës mungesën e avokatëve.
Në momentin kur kryesuesja Saida Dollani u dha fjalën të pandehurve, disa prej tyre replikuan me gjykatën. I pandehuri Gilmando Dani kundërshtoi kërkesën e prokurorit për pezullimin e fateve duke pohuar se avokatët kryesisht ishin zgjedhur prej vetë gjykatës. Ai i kërkoi kryesues Saida Dollani që të dorëhiqej duke i thënë se vetëm kështu mund të zhbllokohej procesi. “Ti e di shumë mirë se çfarë i ke thënë kushëririt tënd E.D.”, i tha Dani kryesuesues Dollani. Edhe i pandehuri Endrit Zela i tha kryesueses së trupës gjykuese, Saida Dollani se nuk mund të vazhdohej më gjyqi. Ndërsa i pandehuri Blerim Shullazi i tha se të nesërmen do të ishin së bashku për ballafaqim në gjykatë dhe se ajo ishte për burg. Gjyqtarja Dollani u tërhoqi vëmendjen të pandehurve që të mos pengonin gjykatën të kryente detyrën e saj dhe i paralajmëroi se në të kundërt ndaj tyre do të vendosej penalitet financiar ose do të largoheshin nga salla.
Në fund gjykata vendosi të zëvendësojë një prej avokateve kryesisht e cila punonte në Bashkinë e Tiranës dhe kishte pezulluar aktivitetin, ndërsa njoftoi katër avokatët e tjerë dhe u kërkoi të pandehurve se nëse do të mbroheshin me avokatë të zgjedhur prej tyre duhet ti lajmëronin për seancën e radhës që u vendos të zhvillohet më datë 18 qershor, ora 12:30.