Kryetari i Partisë Demokratike u paraqit në Prokurorinë e Tiranës për t’u njohur me akuzat ndaj tij për pastrim parash dhe falsifikim dokumentesh. Lulzim Basha tha se prokuroria s’kishte prova dhe akuzat ishin “sajuar në zyrën e kryeministrit Edi Rama”.
Kryetari i Partisë Demokratike u paraqit mëngjesin e të mërkurës në Prokurorinë e Tiranës për t’u njohur me akuzat ndaj tij për pastrim parash dhe falsifikim dokumentesh. Ai akuzohet sëbashku me ish-Sekretarin e Përgjithshëm të PD Arben ristani dhe financierin e kësaj partie për mosdeklarim në KQZ të një shume prej rreth gjysmë milioni dollarë të përdorur për lobim në SHBA dhe po ashtu qarkullimin e këtyre parave përmes kompanive offshore.
Të hënën Partia Demokratike pati pretenduar se Lulzim Basha dhe dy funksionarë të tjerë të kësaj partie, nuk do të paraqiteshin në prokurori pasi kërkesa formale nuk ishte e plotë ligjërisht.
Basha u tha mediave pasi doli prej prokurorisë se ishte paraqitur për të mos i dhënë mundësi qeverisë të përdorte mosparaqitjen për të shpërqëndruar vëmendjen nga skandalet e publikuara në të përditshmen gjermane BILD.
“E vetmja arsye pse jam këtu është që të shërbej si shpërqendrim për ju dhe qytetarët nga skandalet që kanë plasur nga ‘Bild’ dhe nga ato që do të plasin nesër”, tha Basha.
Ai pretendoi se prokuroria nuk kishte asnjë fakt dhe “asnjë provë ndryshe apo shtesë që nga 25 maji kur unë isha këtu”. Basha shtoi se akuza ndaj tij është montuar nga Edi Rama.
Ditën e martë Arben Ristani, ish-Sekretar i Përgjithshëm i PD-së, gjithashtu i akuzuar në këtë çështje, u paraqit para prokurorëve. Atij iu komunikuan të njëjtat akuza si ato që rëndojnë ndaj Bashës. Ristani tha se ndaj tij nuk kishte prova dhe ai nuk kishte asnjë lidhje me çështjen. Ai po ashtu i cilësoi akuzat politike.
Prokuroria e Tiranës nisi javën e kaluar një ftesë për paraqitje ndaj Bashës, ish-Sekretari i Përgjithshëm i PD Arben Ristani dhe financieri Ilir Dervishi, për akuzat e parashikuara nga nenet 287/ç dhe 190/3 të Kodit Penal, që kanë të bëjnë me “pastrim parash” dhe “falsifikim dokumentesh”.
Prokuroria i nisi hetimet pas një investigimi të BIRN që gjeti se Partia Demokratike fshehu pagesa prej më shumë se gjysmë milionë dollarë për një kompani lobimi në Uashington dhe dështoi të bënte transparencë në Komisionin Qendror të Zgjedhjeve, ndërkohë që njëra prej transfertave u bë nga një kompani guackë me aksionerë anonimë e regjistruar në parajsa fiskale.
