Pasuria e kryetarit të bashkisë së Librazhdit, Kastriot Gurra u dyfishua gjatë periudhës së deklarimit në ILDKPKI, nga viti 2013 në vitin 2017.
Kastriot Gurra u zgjodh kryebashkiak i Librazhdit në vitin 2015-të me 65.11 % të votave si përfaqësues i Partisë Socialiste, i mbështetur nga Aleanca për Shqipërinë Europiane.
Gurra e ka filluar karrierën në vitin 2006 si drejtor juridik në bashkinë Prrenjas, një post që e ka mbajtur deri në vitin 2011, ndërkohë nga vitin 2013 deri në vitin 2015 ai ka mbajtur postin e drejtorit te Aluiznit për qarkun e Elbasanit. Gurra ka studiuar për juridik në Universitetin e Tiranës, ku ka marrë titullin jurist ne vitin 2006.
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit në fund të mandatit të tyre 4-vjeçar.
Skeda grafike e mëposhtme paraqet pasurinë e deklaruar nga kryetari i Bashkisë së Librazhdit nga viti 2013 deri në fund të vitit 2017. [Kliko për skedën në PDF]
Në deklaratën përpara fillimit të detyrës në vitin 2013, kryetari i bashkisë së Librazhdit Kastriot Gurra ka pasur një pasuri të deklaruar prej 4.6 milionë lekë, në fund të vitit 2017 pasuria familjare e subjektit kap vlerën 9.3 milionë lekë. Kjo pasuri përbëhet nga 2.9 milionë lekë likuiditete në bankë, 840 mijë lekë likuiditete në cash dhe 5.5 milionë lekë pasuri të paluajtshme.
Të ardhurat familjare të subjektit gjatë periudhës së deklarimit kapin vlerën 11 milionë lekë dhe vijnë kryesisht nga paga për shkak të funksionit dhe paga e bashkëshortes, si dhe të ardhura nga një vendim gjyqësor me vlerë prej 2.4 milionë lekë. Subjekti ka marrë dhe një dëmshpërblim nga emergjencat civile në vlerë 858,726 lekë.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq' që identifikohen gjatë kontrollit. BIRN kreu kontrollin aritmetik/logjik për 5 vite të deklarimit, të cilat rezultuan pa probleme.
Megjithatë, nga analiza cilësore e deklaratave u vërejt se në vitin 2014 dhe 2015 subjekti Kastriot Gurra deklaron të ardhurat mujore të bashkëshortes në shumën 18,000 lekë nga komuna Lunik dhe 18,000 lekë nga komuna Velcan, pa cilësuar periudhën e punësimit në secilin nga këto institucione.
Deklarata Para Fillimit të Detyrës
Deklarata e pasurisë së vitit 2014
Deklarata e pasurisë së vitit 2015
Deklarata para fillimit të detyrës 2015
Deklarata e pasurisë së vitit 2016
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al