Pasuria e kryetarit të bashkisë Korçë , Sotiraq Filo u rrit me 1.2 herë gjatë periudhës që ai ishte subjekt i deklarimit të interesave private në ILDKPKI.
Sotiraq Filo u zgjodh kryetar i bashkisë Korçë në vitin 2015 si kandidat i Partisë Socialiste me 59.07 % të votave.
Filo ka lindur në Korçë më 23 qershor 1971. Ai ka studiuar në gjimnazin “Raqi Qirinxhi” dhe më pas është diplomuar në Fakultetin e Inxhinierisë Elektrike, Dega Elektronikë në Universitetin e Tiranës. Sotiraq Filo ka një eksperiencë të pasur pune duke punuar si profesionist dhe drejtues në sektorin bankar dhe administratën publike. Përpara se të zgjidhej kryebashkiak ai ka mbajtur postin e zv/kryetarit të bashkisë Korçë. [Lexo CV-në e plotë]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit në fund të mandatit të tyre 4-vjeçar.
Skeda grafike e mëposhtme paraqet pasurinë e deklaruar nga kryetari i Bashkisë Korçë nga viti 2013 deri në fund të vitit 20137. [Kliko për skedën në PDF]
Në deklarimin përpara fillimit të detyrës në vitin 2013, kryetari i bashkisë së Korçës Sotiraq Filo deklaron një pasuri familjare me vlerë 30.3 milionë lekë. Ndërkohë në fund të vitit 2017, pasuria familjare e subjektit kap një vlerë prej 35.2 milionë lekë. Kjo pasuri përbëhet nga 22.4 milionë lekë likuiditete bankare dhe një shtëpi banimi me vlerë 12.7 milionë lekë.
Të ardhurat e subjektit gjatë periudhës së deklarimit kapin një vlerë 10.6 milionë lekë dhe vijnë nga paga dhe shpërblime për shkak të funksionit, paga e bashkëshortes dhe interesat bankare.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq' që identifikohen gjatë kontrollit. BIRN kreu kontrollin aritmetik/logjik për 5 vite të deklarimit, të cilat rezultuan pa probleme.
Deklarata e pasurisë para fillimit të detyrës
Deklarata e pasurisë e vitit 2013
Deklarata e pasurisë e vitit 2014
Deklarata e pasurisë e vitit 2015
Deklarata e Pasurisë e vitit 2016
Deklarata e pasurisë e vitit 2017
Për më shumë dokumente vizitoni databazën tonë dokumente.reporter.al