Një operacion i koordinuar nga Europol në 7 vende të Europës përfshi Shqipërinë solli arrestimin e 42 personave që dyshohet se trafikuan 1650 kg kokainë në BE. Në Shqipëri u arrestua një person i dyshuar si kreu i organizatës dhe u sekuestruan mbi 1 milion euro pasuri.
Një operacion ndërkombëtar antidroge i zhvilluar në disa shtete të Evropës dhe në Shqipëri të mërkurën u mbyll me arrestimin e 42 personave, mes të cilëve edhe kreu i dyshuar i këtij grupi të strukturuar në trafikimin e lëndëve narkotike.
Policia e Shtetit njoftoi arrestimin e “A. B., 51 vjeç, banues në Shkodër, me rol aktiv (kryetar i grupit kriminal)” dhe sekuestrimin e më shumë se një milion eurove pasuri, përfshi 200 mijë euro dhe 10 milion lekë cash. BIRN mësoi nga policia se i arrestuar ishte Astrit Beqiri. Një person i dytë, i afërm i Beqirit u shpall në kërkim.
Në njoftimin e Policisë së Shtetit thuhet se operacioni është kryer njëkohësisht në Danimarkë, Suedi, Gjermani, Belgjikë, Holandë, Slloveni dhe Shqipëri. Operacioni i koduar “Goldfinger”, është koordinuar nga EUROPOL dhe është drejtuar nga autoritetet e hetimit në Danimarkë.
Sipas burimeve zyrtare të policisë, autoritetet daneze kanë kërkuar bashkëpunimin e Prokurorisë për Krime të Rënda në Tiranë ku në kuadër të këtij hetimi është regjistruar procedim penal edhe në Shqipëri. Në njoftim thuhet se “autoritet e hetimit të Danimarkës, ato të Suedisë, Gjermanisë, Holandës, Belgjikës, Sllovenisë dhe Shqipërisë, të koordinuara nga EUROPOL, e kanë realizuaar operacionin për ndalimin e anëtarëve të këtij grupi kriminal gjatë ditës së mërkurë, në të njëjtën kohë kur janë vënë në pranga mbi 42 persona në të gjitha këto vende”.
Nga hetimet është arritur të dokumentohet se ky grup i narkotrafikut ka tregtuar mbi 1 650 kg kokainë dhe heroinë brenda vendeve të Bashkimit Evropian.
Policia njofton se gjatë hetimit dhe operacionit për ndalimin e anëtarëve të kësaj organizate në vende të ndryshme janë kontrolluar me dhjetëra ambiente, ku janë gjetur e sekuestruar 40 kg kokainë, mbi 600 mijë euro, armë zjarri, granata, disa automjete dhe objekte të ndryshme, etj.
Policia tha se Beqiri u arrestua me akuzat “pastrimi i produkteve të veprës penale ose veprimtarisë kriminale”, “grupi i strukturuar kriminal” dhe “kryerja e veprave penale nga organizata kriminale dhe grupi i strukturuar kriminal”. Ndërkohë, është shpallur në kërkim edhe një tjetër person i dyshuar si i përfshirë në këtë trafik.
