Gjykata e Krimeve të Rënda dështoi për herë të gjashtë të zhvillonte seancën ndaj tre gjyqtarëve dhe biznesmenit Namik Sadiku; këtë herë për mungesë të dy avokatëve.
Gjykata e Krimeve të Rënda dështoi të zhvillojë për herën e gjashtë radhazi seancën ndaj tre gjyqtarëve të Apelit të Durrësit dhe një biznesmeni, të cilët akuzohen respektivisht për korrupsion pasiv dhe aktiv.
Në sallën e gjyqit të enjten ishin të pranishëm gjyqtarët e akuzuar Kliton Spahiu, Petraq Dhimitri dhe Petrit Çeno si dhe biznesmeni Namik Sadiku, por seanca u shty për shkak të mungesës së mbrojtësve ligjorë Theodhori Sollaku dhe Julian Kola.
Shqyrtimi gjyqësor ndaj tre gjyqtarëve, që akuzohen se kanë ndërmarrë një udhëtim në Spanjë për të parë ndeshjen Real Madrid-Barcelona të paguar nga biznesmeni Sadiku nisi më 9 maj, por nuk ka mundur ende që të zhvillojë seancën e parë gjyqësore.
Procesi gjyqësor në ngarkim të tre gjyqtarëve të Apelit Durrës dhe biznesmenit Sadiku ka dështuar gjashtë herë; dy herë për mungesë të të pandehurve, një herë për shkak të mungesës së prokurorit dhe tre herë pasi nuk janë paraqitur dy prej avokatëve.
Të enjten, i pandehuri Kliton Spahiu i paraqiti gjykatës një kërkesë të avokatit mbrojtës Julian Kola për shtyrjen e seancës gjyqësore me argumentimin se e kishte të pamundur të paraqitej për shkak të arsyeve shëndetësore. Gjykata bëri me dije se bashkëngjitur kërkesës gjendej edhe një raport mjekësor që rekomandonte avokatin Kola për dy ditë pushim. Ndërkohë, i pandehuri Petrit Çeno i bëri me dije gjykatës se avokati i tij, Theodhori Sollaku gjendej në proces tjetër gjyqësor. Ai refuzoi të mbrohej nga një avokat kryesisht dhe kërkoi si përfaqësues ligjor vetëm për seancën e të enjtes avokatin e të pandehurit Petraq Dhimitri, Ilir Kuqin.
Prokurorët Arenc Çela dhe Klodian Braho konstatuan pamundësinë e zhvillimit të seancës në mungesë të dy avokatëve mbrojtës dhe kërkuan shtyrjen për në një datë tjetër. Gjykata e këshilluar në vend, vendosi të shtyjë seancën për më datë 9 korrik, ora 13:00.
Gjyqtarët Kliton Spahiu, Petraq Dhimitri dhe Petrit Çeno u dërguan për gjykim nga Prokuroria për Krime të Rënda në fund të nëntorit 2018, me akuzën “korrupsioni pasiv i gjyqtarëve, prokurorëve apo punonjësve të drejtësisë”. Ndërkohë, biznesmeni Namik Sadiku, po përballet në Gjykatën e Shkallës së Parë për Krime të Rënda me akuzën “korrupsioni aktiv”.
Të dhënat e siguruara më parë nga BIRN prej dosjes hetimore tregojnë se tre gjyqtarët dyshohet se kanë ndërmarrë një udhëtim në Spanjë në tetor 2014 në shoqërinë e biznesmenit Namik Sadiku – pronari i një kompleksi turistik në Durrës dhe se udhëtimi është paguar prej tij. Ky udhëtim përfshinte ndjekjen e ndeshjes së futbollit midis Real Madrid dhe Barcelonës, i njohur si derbi “El Classico”.
