Ministri i Brendshëm propozoi shkarkimin e kryebashkiakut Zef Hila për dhunën e së enjtes në Bushat, por ky i fundit thotë se nuk ka qenë në vendngjarje dhe kërkon që dhunuesit të “dënohen nga gjykata“.
Ministri i Brendshëm Sandër Lleshaj deklaroi të premten se do të kërkojë shkarkimin e kryebashkiakut të Vaut të Dejës Zef Hila duke e akuzuar atë si përgjegjës për incidentin e dhunshëm të së enjtes, kur u sulmua dhe u dogjën materjalet zgjedhore në Komisionin Zonal të Administrimit të Zgjedhjeve në fshatin Bushat.
“Për arsye të një serie shkeljesh të rënda të detyrës dhe të ligjit, të cilat kulmuan mbrëmë me sulmin ndaj KZAZ nr. 6, të realizuar nga punonjës të Bashkisë së Vaut të Dejës, Kryetari i saj do të shkarkohet sot nga detyra me propozim të Ministrit të Brendshëm”, deklaroi Lleshaj.
Hila, i cili ka qeverisur ish-komunën Bushat që nga viti 1996 dhe bashkinë Vau i Dejës që nga viti 2015, e deklaroi veten të pafajshëm ndaj akuzave dhe mohoi të kishte lidhje me incidentin.
“Unë distancohem nga çdo akt dhune,” i tha Hila BIRN në një bisedë telefonike. “Ministri i Brendshëm është i keqinformuar. Unë nuk kam qenë i pranishëm në protestë. Personat që organizuan dhunën të përgjigjen para drejtësisë, nuk kam informacion se kush e ka bërë dhunën. Jam në dijeni që janë arrestuar të afërm të mi, por duhet të pritet drejtësia për shkaktarët e dhunës,” shtoi ai.
Ligjërisht qeveria ka të drejtë të shkarkojë një organ të qeverisjes vendore “për shkelje të ligjeve apo të kushtetutës”, por në mungesë të një gjykate kushtetuese funksionale, procedura mund të mos jetë e realizueshme. Sipas nenit 115 të kushtetutës, “organi i zgjedhur drejtpërdrejt i njësisë qeverisëse vendore mund të shpërndahet ose të shkarkohet nga Këshilli i Ministrave për shkelje të rënda të Kushtetutës ose të ligjeve”, por “organi i shpërndarë ose i shkarkuar mund të ankohet në Gjykatën Kushtetuese brenda 15 ditëve, dhe në këtë rast vendimi i Këshillit të Ministrave pezullohet.”
Gjykata Kushtetuese aktualisht është jashtë funksioni dhe për rrjedhojë, nisma e qeverisë për të shkarkuar një kryebashkiak mund të mbetet pezull i kësaj situate.
