Opozita tentoi të distancojë veten nga ngjarja e dhunshme në të cilën materjalet e nevojshme për zgjedhjet e të dielës u dogjën ndërsa një dyzinë me njerëz u arrestuan.
Policia njoftoi të premten se ka arrestuar katërmbëdhjetë persona dhe po kërkon për nëntë të tjerë pas një sulmi zjarrvënës në qendrën rajonale zgjedhore në fshatin e Bushatit në bashkinë e Vaut të Dejës. Sulmi ndodhi mbrëmjen e kaluar kur rreth 200 vetë u grumbulluan në qendrën rajonale të administrimit zgjedhor për bashkinë Vau i Dejës, një bastion i Partisë Demokratike.
Sipas policisë, ata përdorën bomba molotov dhe ia dolën të djegin materjalet zgjedhore. Tri oficerë policie u plagosën.
Kryeministri Edi Rama dënoi sulmin si një “lëvizje e dëshpëruar” nga opozita.
“Sulmi mbi KZAZ e Vaut të Dejës është shfaqja e egër e dëshpërimit të L.Bashës, M.Kryemadhit, I.Metës dhe S.Berishës,” shkroi ai në Tëitter duke akuzuar krerët e opozitës si dhe presidentin Ilir Meta si përgjegjës për dhunën.
Mes të arrestuarve ka shumë punonjës të bashkisë, përfshirë edhe një nënkryetar. Gjithsesi, Partia Demokratike u përpoq të distanconte veten nga incidenti dhe bëri thirrje që mbështetësit e saj “të mos bien pre e provokimeve”.
“Partia Demokratike dënon skenarin kriminal të Edi Ramës për inkriminimin e opozitës dhe identifikimin e saj me dhunën që ka planifikuar vetë”, shkroi PD në një deklaratë për shtyp.
Opozita theksoi gjithashtu praninë e Tom Doshit, një figurë kontroverse në Shqipërinë e veriut, në përpjekjet elektorale të Partisë Socialiste në zonë, si tregues të bashkëpunimit të Ramës me rrjetet e krimit. Doshi, i cili është vënë në listën e zezë të Departamentit Amerikan të Shtetit vitin e kaluar për “korrupsion domethënës”, u fotografua javën e kaluar duke shoqëruar kryeministrin Edi Rama në takime elektorale në Shkodër.
“Emërimi i Tom Doshit si shef i shtabit politik për Shkodrën, nga Edi Rama, është emblema e qeverisë për 30 Qershorin. Një individ, në listën e zezë të Shteteve të Bashkuara, është garancia që Edi Rama i jep krimit për të bashkëqeverisur,” deklaroi PD.
Shqiptarët janë të ftuar të votojnë në zgjedhjet për pushtetin vendor të dielën por presidenti Ilir Meta pretendon se ka përcaktuar 13 tetorin si një datë e re për këto zgjedhje. Rreth 3.5 milionë votues do të duhet të zgjedhin 61 kryetarë bashkish dhe 1590 këshilltarë. Gjithsesi, në 31 bashki garojnë vetëm kandidatët e Partisë Socialiste ndërsa në pjesën tjetër socialistët garojnë me kandidatë partish të vogla apo të pavarur.
Disa kryebashkiakë të opozitës kanë deklaruar se nuk do të lejojnë zgjedhje të zhvillohen në zonat e tyre. Vau i Dejës, ku ndodhi incidenti i fundit, është një bastion i Partisë Demokratike qeverisur nga i njëjti kryebashkiak që nga viti 1996.