Këshilli i Lartë i Prokurorisë intervistoi të hënën 4 nga 22 kandidatët e SPAK-ut, duke i hapur rrugën ngritjes së strukturës së posaçme, pavarësisht se më shumë se gjysma e kandidatëve nuk kanë kaluar ende në veting.
Këshilli i Lartë i Prokurorisë nisi të hënën procesin e vlerësimit të kandidatëve për prokurorë në Prokurorinë e Posaçme, SPAK, duke intervistuar katër kandidatët e parë nga 22 të tillë që janë ende në garë.
Në orën 09:00 të mëngjesit, në ambjentet e KLP-së u paraqit i pari drejtuesi i prokurorisë së Apelit për Krimet e Rënda, prokurori Altin Dumani, i ndjekur më pas nga drejtuesja e Prokurorisë së Durrësit, Anita Jella, prokurori pranë Krimeve të Rënda, Anton Martini dhe Arben Kraja, prokuror në Prokurorinë e Përgjithshme.
Sipas njoftimit të Këshillit të Lartë të Prokurorisë, intervistat me kandidatët e SPAK-ut do të mbyllen më 12 korrik. Megjithatë, procesi i vlerësimit dhe i renditjes së kandidatëve do të vazhdojë pavarësisht se shumica e kandidatëve nuk e kanë kaluar vetingun.
Nga 22 kandidatët në garë, vetëm 10 prej tyre e kanë kaluar me sukses fazën e parë të vetingut dhe vetëm dy prej tyre janë konfirmuar me vendim të formës së prerë. Dymbëdhjetë kandidatët e tjerë duket se do të qëndrojnë në listën e pritjes, deri sa Komisioni i Pavarur i Kualifikimit të marrë një vendim për fatin e tyre.
Kryetari i KLP-së, Gent Ibrahimi deklaroi të hënën për mediat se Këshilli ka mision të ndryshëm nga ai i Komisionit të Pavarur të Kualifikimit në këtë proces.
“KLP merret me profesionalizmin, ndërsa procesi i rivlerësimit me integritetin. Kam besimin që të dy proceset do shpien drejt rezultateve të njëjta,” tha Ibrahimi.
Kreu i KLP-së shtoi gjithashtu se procesi është duke u monitoruar ngushtësisht nga ndërkombëtarët.
“Ndërkombëtarët janë pjesë e çdo etape të këtij procesi, kanë folur një për një, kanë punuar krah për krah. Ata nuk mund të japin pikë në fund, por ne nuk mund të fluturojmë përtej gjetjeve të procesit. Ne duam të marrim më të mirën e kandidatëve,” shtoi Ibrahimi.
Prokuroria e Posaçme kundër Korrupsionit dhe Krimit të Organizuar, e njohur më së shumti përmes akronimit të vet SPAK, është një prej institucioneve të reja në kuadër të reformës në drejtësi që synon të luftojë korrupsionin e niveleve të larta si dhe krimin e organizuar në Shqipëri.
Prokurorët e SPAK emërohen nga Këshilli i Lartë i Prokurorisë për një mandat 9 vjeçar, pa të drejtë riemërimi. Sipas nenit 148/dh të Kushtetutës, kandidati për prokuror të posaçëm si dhe familjarët e tij i nënshtrohen procesit të verifikimit të pasurisë dhe të figurës, si dhe japin pëlqimin për kontrollin periodik të llogarive bankare dhe telekomunikacioneve personale sipas ligjit.
Këshilli i Lartë i Prokurorisë ka vendosur që të kryejë procedurën e vlerësimit dhe të renditjes për të gjithë kandidatët, duke përcaktuar kështu ngritjen e SPAK-ut me një numër minimal prokurorësh. Të tjerët do të duhet të presin procesin e vetingut për të siguruar një vend në Prokurorinë e Posaçme.
Kandidatët që kanë kaluar vetingun
Arben Kraja, Prokuroria e Përgjithshme
Behar Dibra, Prokuroria e Krimeve të Rënda
Besnik Muçi, Prokuroria e Krimeve të Rënda (I apeluar)
Donika Prela, Prokuroria e Krimeve të Rënda (E apeluar)
Dritan Prençi, Prokuroria e Krimeve të Rënda
Edvin Kondili, Prokuroria e Krimeve të Rënda
Ened Nakuçi, Prokuroria e Krimeve të Rënda
Enkeleda Millonai, Prokuroria e Elbasanit
Manjola Kajana, Prokuroria e Krimeve të Rënda
Vladimir Mara, Prokuroria e Krimeve të Rënda
Kandidatët që nuk kanë kaluar ende në veting
Altin Dumani, Prokuroria e Apelit për Krime të Rënda
Anita Jella, drejtuese e Prokurorisë së Durrësit
Anton Martini, prokuror i Krimeve të Rënda
Besim Hajdarmataj, prokuror i Krimeve të Rënda
Doloreza Musabelliu, prokurore e Krimeve të Rënda
Dorina Bejko, prokurore në Prokurorinë e Pogradecit
Elida Kaçkini, prokurore në Prokurorinë e Tiranës
Elisabeta Imeraj, drejtuese e Prokurorisë së Tiranës
Enkeleda Xhengo, prokurore e Prokurorisë së Durrësit
Klodian Braho, prokuror i Krimeve të Rënda
Ndini Tavani, prokuror në Prokurorinë e Tiranës
Maksim Sota, prokuror në Prokurorinë e Vlorës
