Sindikata e Punonjësve të Universiteve të Shqipërisë dhe Fakulteti i Shkencave të Natyrës i kanë kërkuar qeverisë të tërhiqet nga tjetërsimi i pronësisë së Kopshtit Botanik nga universiteti te Bashkia e Tiranës, duke e cilësuar si “cënim të lirisë akademike”.
Sindikata e Punonjësve të Universiteve të Shqipërisë (SPUSH) kërkoi, përmes një njoftimi për media, qeverisë të tërhiqej nga vendimi i datës 17 korrik për të ndryshuar pronësinë e Kopshtit Botanik nga Universiteti i Tiranës te Bashkia e Tiranës. Më herët për këtë tjetërsim kishte reaguar vetë Fakulteti i Shkencave të Natyrës, duke e cilësuar “cënim të rëndë të lirisë akademike”.
Në të njëjtën linjë është edhe letra e firmosur nga kreu i SPUSH prof.asoc.dr Sandër Kovaçi dhe Sekretarja e Përgjithshme Prof. Asoc. Dr. Enkeleda Olldashi shprehet shqetësimi se vendimi i qeverisë është vijim i tentativave për të marrë nënkontroll pronat të universiteteve, ndërsa shprehin frikë për tjetërsimin e tyre. Ata thonë se vendimi në fjalë “cënon rëndë autonominë universitare dhe lirinë akademike sepse KBT, është i vetmi institucion kërkimor-mësimor në vend në fushën e florës”.
Por pa u tharë mirë boja në këto reagimi qeveria në mbledhjen e 25 korrikut ka vendosur që prona të Universitetit Bujqësorë të Tiranës t’i kalojnë Ministrisë së Bujqësisë. “Kalimin, nga varësia e Ministrisë së Arsimit, Sportit dhe Rinisë (Universiteti Bujqësor, Tiranë) te Ministria Bujqësisë dhe Zhvillimit Rural, të laboratorëve të diagnostikimit të parazitëve të Departamentit të Mbrojtjes së Bimëve, pranë Universitetit Bujqësor të Tiranës, të tokës bujqësore, trojeve, godinave dhe objekteve të tjera të ndërtuara mbi to”, thuhet në vendimin e publikuar më 25 korrik në faqen e qeverisë.
Ndërkohë ndryshimi i pronësisë së Kopshtit Botanik të Tiranës shihet nga sindikata ashtu edhe FNSH si kërcënim. Në reagime paraqiten si shembuj shpronësimin e Fakultetit të Shkencave të Natyrës nga muzeu, tentativën për të tjetërsuar godinën e Fakultetit të Gjeologji Minierave dhe përplasjen e Bashkisë së Tiranës me Universitetin Bujqësorë të Tiranës për pjesë të pretenduara të kampusit të UBT-së.
“Përvojat e hidhura të deritashme të Fakultetit të tonë me Muzeun e Shkencave të Natyrës, Departamentin e Bioteknologjisë, “ngrënien” e paradokohshme të një cope nga Kopshti në fjalë së bashku me godinën dykatëshe (dhuratë nga Ambasada Amerikane), për kalimin e Unazës së Re, nuk japin asnjë garanci, përkundrazi, flasin në të kundërt të ndonjë mundësie të realizimit të funksionit dhe misionit të Kopshtit Botanik nga ndonjë insititucion tjetër jashtë Universitetit të Tiranës”, thuhet në reagimin e FNSH-së.
Fakulteti shprehet se ishte i gatshëm për bashkëpunim dhe se mirëpriste investimet e Bashkisë së Tiranës, por pa cënuar funksionin e KBT-së. Po ashtu në të dy reagimet kërkohej prishja e VKM-së dhe paralajmërohet se do të merreshin masa për ta zhbërë atë. “Jemi të vendosur për të ndërmarrë të gjitha hapat e nevojshëm për anulimin e kësaj VKM-je në mbrojtje të Kopshtit Botanik, si aset kombëtar kërkimor dhe mësimor i pazëvendësueshëm”, thuhet në reagimin e FNSH.
Reagimet vënë në dukje se Kopshti Botanik është i vetëm në llojin e tij në Shqipëri dhe se ai është ndërtuar dhe mbajtur nga pedagogët dhe studentët e FNSH-së për gati 50 vjet.
Vendimi i Këshillit të Ministrave i datës 17 korrik ndryshon pronësin e Kopshtit Botanik të Tiranës nga universiteti te Bashkia e Tiranës. Në vendim thuhet se bashkia merr në zotërim KBT “për t’i përdorur për ushtrimin e funksioneve të veta”. Po ashtu aty kërkohet që mes bashkisë dhe universitetit të lidhet një marrëveshje për garantimin e “aktivitetit mësimor e të veprimtarive kërkimore-shkencore të Universitetit të Tiranës”.
VKM po ashtu shprehet se bashkisë i ndalohet tjetërsimi i sipërfaqeve që i bashkangjitet vendimit. Në botimin e aktit në fletoren zyrtare listohen 7 pasuri me një sipërfaqe totale prej 111.804 metra katrorë ose rreth 10.2 hektarë.
