Këshilli i Emërimeve në Drejtësi miratoi të martën kandidaturën e Marsida Xhaferllarit për një vakancë të shpallur në Gjykatë Kushtetuese dhe për postin e Inspektorit të Lartë të Drejtësisë.
KED vendosi të martën lejimin e kandidimit të Marsida Xhaferllarit për Inspektor të Lartë të Drejtësisë dhe vakancën e shpallur nga Presidenti i Republikës në 4 mars 2019, për gjyqtar në Gjykatën Kushtetuese, duke përmbyllur procedurat e verifikimit të kandidatëve për këtë dy institucione.
“Sikurse edhe në rastet e tjera të deritanishme, shqyrtimi i rasteve të kandidatëve për vendet vakante për gjyqtar në Gjykatën Kushtetuese dhe për Inspektorin e Lartë të Drejtësisë është vendosur në përfundim të procedurave të verifikimit rigoroz dhe të thelluar të ndjekura nga Këshilli, sipas ligjit dhe standardeve tashmë të njohura e të aplikuara që kërkohen për përzgjedhjen, qenien dhe konfirmimin në detyrën e magjistratit apo anëtarit të Gjykatës Kushtetuese,” tha KED nëpërmjet një njoftimi për shtyp.
Xhaferllari e ka filluar karrierën si gjyqtare në Gjykatën e Rrethit Gjyqësor Fier, ku ka shërbyer nga viti 1999 deri në vitin 2007. Në periudhën dhjetor 2007 deri në shtator 2008, ajo ka punuar si këshilltare e Ministrit të Drejtësisë dhe nga shtatori 2008 e deri në janar 2013, si drejtor në Drejtorinë e Kodifikimit si dhe Drejtorinë e Përgjithshme të Çështjeve të Drejtësisë në Ministrin e Drejtësisë.
Në vitin 2013 Xhaferllari u emërua kryeinspektore në Këshillin e Lartë të Drejtësisë, një post që ajo e ka mbajtur deri zëvendësimin e KLD-së me Këshillin e Lartë Gjyqësor.
Ajo iu nënshtrua procesit të rivlerësimit kalimtar të gjyqtarëve dhe prokurorëve për të tre kriteret e vetingut, por në përfundim të procesit KPK vendosi me shumicë votash se ajo e kishte humbur statusin e magjistratit dhe se për këtë KPK nuk mund të vendoste konfirmimin ose jo të saj.
Xhaferllari e ka ankimuar vendimin e KPK-së në Kolegjin e Posaçëm të Apelimit.
Kandidatët për Inspektoriatin e Lartë
1-Artur Malaj
2-Artur Metani
3-Eris Hysi
4-Marsida Xhaferllari
Kandidatët për Gjykatën Kushtetuese
1-Arta Vorpsi
2-Besnik Muçi
3-Elsa Toska
4-Fiona Papajorgji
5-Marsida Xhaferrllari
6-Regleta Panajoti