Gazetarët Aurel Rakipllari nga Syri.net dhe Daniela Grrica nga Shekulli u proceduan në gjendje të lirë nën dyshimin se kanë shkelur nenin 267 të Kodit Penal, pas panikut që mbërdheu shqiptarët natën e së dielës nga frika për një tërmet.
Dy gazetarë të ndaluar natën e kaluar nga policia nën dyshimin se kanë përhapur panik përmes publikimit të një njoftimi që sugjeronte rrezik për një tërmet të madh u liruan dhe po ndiqen në gjendje të lirë, nën dyshimin se kanë shkelur nenin 267 të Kodit Penal.
Një zëdhënës i policisë i tha BIRN se gazetarët Aurel Rakipllari dhe Daniela Grrica janë referuar në prokurori. Të dy dyshohen se janë përgjegjës për panikun që shtyu një pjesë të banorëve të Tiranës të dilnin nga banesat e tyre në mes të natës nga frika e një tërmeti të madh.
Lajmi i shfaqur në mediat online rreth orës 9 të së dielës, pasi Shqipëria qendrore u godit nga një tërmet tjetër me magnitudë 4.4 dhe intensitet VI, paralajmëronte për një tërmet tjetër të madh për më vonë dhe bënte thirrje në mënyrë eksplicite për largim nga banesat.
Institucione të ndryshme të qeverisë, përfshirë kryeministrin Edi Rama, denoncuan menjëherë informacionin e publikuar si të pavërtetë, por kjo duket se nuk mjaftoi për të bindur qytetarët e alarmuar.
Neni 267 i Kodit Penal parashikon dënime me gjobë ose me burgim deri në pesë vjet burg për rastet kur përhapin informacion “me qëllim që të ngjallë gjendje pasigurie dhe paniku”.
Syri.net, i cili u kritikua publikisht nga qeveria për përhapje paniku, e deklaroi ngjarjen “një titull emocional” por që në thelb, “kishte për qëllim shërbimin ndaj qytetarëve”, [link] ndërsa gazeta Shekulli deklaroi se distancohet nga lajmi duke thënë se nuk ka qenë kjo gazetë burimi i tij. [link]
Zëvendëskryeministri Erjon Braçe e deklaroi ngjarjen “të qëllimtë dhe të organizuar”, që sipas tij, kishte për synim krijimin e kaosit.
