Prokuroria e Krimeve të Rënda kërkoi shpalljen fajtor të gjyqtarit Roland Hysi për veprat penale të “korrupsionit pasiv” dhe “ushtrimit të ndikimit të paligjshëm”.
Prokuroria për Krime të Rënda kërkoi të enjten dënimin me 4 vite burg për gjyqtarin e Fierit, Roland Hysi, i akuzuar për veprat penale të “korrupsioni pasiv” dhe “ushtrim i ndikimit të paligjshëm ndaj personave që ushtrojnë funksione publike”. Prokuori i çështjes, Klodian Braho paraqiti konkluzionet përfundimtare që bazoheshin në pamjet filmike të transmetuara në datën 8 janar 2019 në emisionin “Stop” të televizionit Klan, ku në bisedat e siguruara nëpërmjet kamerave të fshehta përfshihej gjyqtari Hysi dhe psikologia Elona Meçani.
Sipas prokurorisë, në pamje shfaqet fakti se një qytetare i jep psikologes 500 euro për gjyqtarin Hysi, duke i premtuar edhe 500 euro të tjera pasi procesi të përfundojë në favorin e saj. Pamjet sugjerojnë gjithashtu se gjyqtari Roland Hysi i kërkon favore seksuale nënës së divorcuar në këmbim të vendimit gjyqësor.
Veç dënimit me 4 vjet heqje lirie, prokurori Braho kërkoi edhe dënim plotësues për moslejimin e Hysit të ushtrojë funksione publike për 3 vite. Pas njohjes me kërkesat përfundimtare të organit të akuzës, treshja gjykuese e Krimeve të Rënda, e përbërë nga gjyqtarët Sandër Simoni, Klodian Kurushi dhe Daniela Shirka shtyu seancën për t’i dhënë kohë mbrojtjes të përgatisë konkluzionet e saj. Nëse do të dënohet, gjyqtari Roland Hysi, aktualisht i pezulluar, do të përfitojë ulje të dënimit për shkak të përfitimit të gjykimit të shkurtuar. Ndërkohë, çështja për psikologen Elona Meçani ka kaluar për shqyrtim pranë Gjykatës së Rrethit Gjyqësor Fier.