Gjykata ka pranuar trasferimin e dosjes hetimore për vrasjen e Malkos pranë Gjykatës së Krimeve të Rënda, pas dyshimeve se krimi është kryer prej një grupi të strukturuar kriminal.
Policia e Shtetit njoftoi të shtunën zbardhjen dhe dokumentimin e vrasjes së 26-vjeçarit Santiago Malko, i cili u ekzekutua me armë zjarri mbrëmjen e 27 gushtit në rrugën “Xhanfize Keko” në Tiranë.
Sipas policisë, janë shpallur në kërkim 8 persona që dyshohet të kenë bashkëpunuar dhe të jenë përfshirë në këtë ngjarje dhe janë sekuestruar në cilësinë e provës materiale automjetet e përdorura nga autorët për të kryer krimin, si edhe sendet e gjetura në brendësi të tyre.
“Gjykata e Shkallës së Parë Tiranë ka vendosur si masë sigurimi personal ‘arrest me burg’ në mungesë, ndaj shtetasve: L. D., E. D., I. S., O. L., D. A., A. M., Xh. N., (të shtatë banues në Tiranë) dhe F. H., (M.,) banues në Vlorë”, citohet në njoftimin e Policisë së Shtetit.
Në njoftim shtohet se Gjykata e Rrethit Gjyqësor Tiranë ka pranuar kërkesën e Prokurorisë për t’i klasifikuar në kuadrin e një grupi të strukturuar kriminal të dyshuarit për kryerjen e veprave penale “Vrasja me paramendim”, “Mbajtja pa leje e armëve shpërthyese dhe municionit” dhe “Vjedhja”.
Sipas policisë, po për këtë ngjarje, me urdhër të prokurorisë është ndaluar më herët edhe shtetasi B. T., banues në Tiranë.
“Grupi hetimor gjatë veprimeve procedurale ka arritur të gjejë dhe sekuestrojë në cilësinë e provës materiale 8 automjete, mes tyre dhe automjetet e përdorura nga autorët për të kryer krimin, si dhe sendet e gjetura në brendësi të tyre… . …Gjithashtu kjo ngjarje i ka kaluar Gjykatës së Shkallës së Parë për Krime të Rënda për ndjekje të mëtejshme”, thuhet në njoftim.
