Komisioni i Pavarur i Kualifikimit shkarkoi të premten nga detyra prokurorin e Prokurorisë së Rrethit Gjyqësor Tiranë, Ndini Tavani – njëkohësisht kandidat për Strukturën ë Posaçme Kundër Krimit të Organizuar dhe Korrupsionit, SPAK.
Trupa gjykuese e KPK-së e përbërë nga Alma Faskaj kryesuese, Brunilda Bekteshi relatore dhe Roland Ilia anëtar, vendosi me shumicë votash shkarkimin nga detyra të prokurorit Ndini Tavani.
Procesi i rivlerësimit për prokurorin Ndini Tavani është kryer në të tri kriteret e vetingut, përfshirë pasurinë, pastërtinë e figurës dhe profesionalizmin.
Ndini Tavani ka përfunduar studimet për drejtësi dhe ka ushtruar profesionin e avokatit në vitet 2003-2004. Më pas, ai ka vazhduar studimet në Shkollën e Magjistraturës dhe pas vitit 2007 ka ushtruar funksionin e prokurorit në Durrës, Vlorë dhe Tiranë.
Gjatë seancës dëgjmore të mbajtur me 7 tetor, Komisioni i Pavarur i Kualifikimit ka konstatuar probleme për të tre kriteret e rivlerësimit dhe i ka kaluar subjektit barrën e provës.
Tavani ka dhënë shpjegimi për problemet e konstatuara nga hetimi administrativ dhe ka kërkuar konfirmimin në detyrë. Shpjegimet e dhëna nga prokurori kanë bindur vetëm një anëtar të trupës gjykuese të KPK-së. Dy anëtarët e tjerë kanë vendosur për shkarkimin nga detyra të prokurorit.
