Të Gjelbërit/EFA në Parlamentin Europian paraqitën një rezolutë e cila kritikon presidentin francez Emmanuel Macron për refuzimin e fillimit të negociatave të anëtarësimit në BE me Shqipërinë dhe Maqedoninë e Veriut.
Eurodeputetët nga grupi i Gjelbërve/EFA në Parlamentin Europian të mërkurën paraqitën një mocion për një rezolutë që dënon Francën për veton për hapjen e negociatave të pranimit me Shqipërinë dhe Maqedoninë e Veriut gjatë samitit të Këshillit Europian javën e kaluar.
Edhe pse si Maqedonia e Veriut ashtu edhe Shqipëria morën mbështetje për përpjekjen e tyre për të filluar negociatat nga një numër vendesh përpara takimit të Këshillit Europian, në samit, presidenti francez Emmanuel Macron bllokoi procesin, duke thënë se BE-ja ka nevojë për reforma para çdo zgjerimi të mëtejshëm.
Rezoluta e propozuar e Gjelbërve, e cila duhet të kalojë një votim të enjten në seancën plenare të Parlamentit Europian pas një debati të mërkurën, shpreh keqardhjen e saj për vendimin e Këshillit Europian dhe thekson se “duke mos arritur të përmbushë premtimet dhe angazhimet e saj ndaj të dy këtyre vendeve, BE-ja rrezikon të humbasë kredibilitetin” në rajonin e Ballkanit Perëndimor.
Ajo thotë se procesi i zgjerimit “duhet të udhëhiqet nga kritere objektive, dhe jo nga politika të brendshme ose polemika bilaterale” në vendet anëtare të BE-së.
Rezoluta e propozuar gjithashtu i bën thirrje Këshillit Europian që “të marrë përsipër përgjegjësinë e tij dhe të gjejë një kompromis konkret” në takimin e tij të ardhshëm në dhjetor.
Këshilli Europian deklaroi javën e kaluar se ai ka sugjeruar rishikimin e temës së zgjerimit jo më shpejt sesa maji 2020 në Samitin BE-Ballkan Perëndimor që do të mbahet në Zagreb.
Me strategjinë e re për zgjerimin të Ursula von der Leyen, e cila nuk pritet para marsit 2020, dhe me zgjedhjet presidenciale të Francës që priten të mbahen pas tre vjetësh, ekspertët nuk besojnë se Shqipëria dhe Maqedonia e Veriut mund të hapin realisht kapitujt e tyre të parë në procesin e negociatave të anëtarësimit përpara vitit 2022.
Nëse miratohet, rezoluta e të Gjelbërve/EFA mund të shihet një sinjal për të dy vendet, por edhe për pjesën tjetër të Ballkanit Perëndimor, që procesi i zgjerimit të bllokut nuk është plotësisht i vdekur.
Komisioni Europian rekomandoi hapjen e negociatave me Shqipërinë në vitin 2016, ndërsa Maqedonia e Veriut mori të njëjtin miratim në vitin 2009.
Që atëherë, Maqedonia e Veriut ka zgjidhur pengesën e fundit në rrugën e saj europiane duke i dhënë fund mosmarrëveshjes së saj të gjatë me Greqinë me nënshkrimin e Marrëveshjes së Prespës në vitin 2018 dhe duke ndryshuar zyrtarisht emrin e saj.
Rezoluta e të Gjelbërve/EFA thuhet se mbështetet nga një numër i madh grupesh politike në Parlamentin Europian.