Agim Bendo, një ndër gjyqtarët më të pasur të Gjykatës së Apelit të Tiranës paraqiti kërkesën në Këshillin e Lartë Gjyqësor, duke u bërë zyrtari i 30 që largohet me dorëheqje që prej nisjes së procesit të vetingut.
Gjyqtari i Apelit të Tiranës, Agim Bendo largohet me dorëheqje nga sistemi i drejtësisë. Kërkesa e tij i është paraqitur Këshillit të Lartë Gjyqësor dhe është parashikuar të diskutohet në mbledhjen e së hënës.
Bendo e ka filluar karrierën në gjyqësor në vitin 1992 dhe përgjatë dy dekadave të fundit ka punuar si gjyqtar në shkallë të parë dhe në Gjykatën e Apelit të Tiranës. Në shtator 2013, Bendo ishte pjesë e trupës gjykuese që dha vendimin e diskutueshëm për çështjen e 21 Janarit, duke dënuar me vetëm 1 vit burg ish-kreun e Gardës, Ndrea Prendi dhe me 3 vjet gardistin Agim Llupo për vrasjen e 4 protestuesve përballë Kryeministrisë.
Gjyqtari i Apelit të Tiranës është zyrtari i tridhjetë që largohet nga sistemi me dorëheqje, që prej fillimit të procesit të vetingut. I renditur si një ndër pesë gjyqtarët më të pasur të Apelit të Tiranës nga një studim i zhvilluar në vitin 2014 nga BIRN, Bendo ndodhej nën hetimin administrativ të Komisionit të Pavarur të Kualifikimit prej një viti.
Neni G i Kushtetutës u njeh zyrtarëve të drejtësisë të drejtën për t’u dorëhequr, duke ndërprerë njëherazi edhe procesin e vetingut. Megjithatë, dispozita parashikon që zyrtarët e dorëhequr nuk mund të ushtrojnë asnjë funksion në sistem për 15 vitet e ardhshme.
Bendo është gjyqtari i katërt që ka dhënë dorëheqjen në KLGJ përgjatë vitit 2019. Më herët u larguan me dorëheqje edhe gjyqtarja e Durrësit, Ema Gashi, gjyqtarja e Tiranës, Eneida Civici dhe kryetarja e Gjykatës së Durrësit, Joana Qeleshi.
