Policia njoftoi arrestimin e Redian Rraja, i afërm i deputeti të PS Rrahman Rraja, si një prej të dyshuarve për atentatin ndaj prokurorit Arjan Ndoja dhe dy personave që ndodheshin në makinë me të.
Një nga të dyshuarit për atentatin ndaj prokuorit Arjan Ndoja dhe dy personave që ndodheshin bashkë me të në makinë, u arrestua të martën nga policia. Në një njoftim për shtyp bëhet me dije se ishte arrestuar Redian Rraja, 34 vjeç.
“Nga tërësia e provave të sekuestruara dhe bazuar në dyshimet e arsyeshme u bë ekzekutimi i urdhër-ndalimit të lëshuar nga Prokurori i Krimeve të Rënda për shtetasin R. Rr, 34 vjeç, lindur e banues në fshatin Nikël, Fushë-Krujë, i dyshuar si një nga autorët e mundshëm të plagosjes me armë të prokurorit dhe dy shtetasve të tjerë”, thuhet jnë njoftimin e policisë.
Policia pretendon se Rraja është identifikuar për shkak të provave të gjetura në vendin ne ngjarjes. Ajo bën me dije se pas gjetjes së mjetit të braktisur që dyshohet se ishte përdorur nga autorët, në të janë gjetur edhe armët e përdorura në krim. “Gjatë këqyrjes së këtij mjeti janë sekuestruar edhe prova të tjera materiale, të cilat dyshohen se janë përdorur nga autorët, konkretisht: dy armë zjarri AK 47, dy maska, një sasi lënde djegëse dhe sende të tjera”, thuhet në njoftimin e policisë.
Prokuroria e Krimeve të Rënda ka ngritur tre akuza për pjesëmarrësit në atentat, “Vrasja e funksionarëve publikë”, “Vrasja kundër dy ose më shumë personave”, e kryer në bashkëpunim, e mbetur në tentativë” dhe “Armëmbajtja pa leje”.
Policia po ashtu tha se kishte kontrolluar 11 banesa në Krujë, Tiranë dhe Lushnje. “Si rezultat i këyre kontrolleve u gjetën dhe u sekuestruan prova materiale që dyshohet se kanë lidhje me autorët e mundshëm të kësaj ngjarjeje”, thuhet në njoftim.
Rraja u arrestua si i dyshuar për atentatin e 1 nëntorit në të cilin mbeti i plagosur prokurori i Durrësit Arjan Ndoja, 42 vjeç, Andi Maloku, 30 vjeç dhe një person i tretë i regjistruar si Pullumb Muharremaj me banim në Sukth, i cili në njoftimin e policisë rezulton me inicialet A.L, 46 vjeç.
Një burimi të Policisë së Shtetit tha pas atentatit, se Pullumb Muharremaj është në të vërtetë Landi Muharremaj dyshuar për përfshirje në krim të organizuar dhe pronar tokash në Gjirin e Lalzit, i cili në shtator 2016 u shpall në kërkim nga policia për rrahjen e biznesmenit libanez, Faadi Mitri në sy të bashkëshortes dhe vajzës së tij.
Ndërkohë Rraja është i afërm i deputetit të Partisë Socialiste Rrahman Rraja dhe ka qenë edhe më herët i proceduar penalisht dhe është denoncuar në një rast publikisht nga ish-oficeri i policisë Emiljano Nuhu se e kishte kërcënuar për të mbyllur hetimet ndaj djalit të deputetit, i akuzuar për dhunimin e të dashurës.
Në një prononcim për një televizion mëngjesin e të martës deputeti i PS mohoi lidhjen e afërt me të arrestuarin. Ai tha se ata ishin kushurij të tretë nga babai dhe shtoi se fajtorët për atentatin duhej të dënoheshin maksimalisht.
Nga ana tjetër prokurori Arjan Ndoja u akuzua në fillim të tetorit nga kryeministri Edi Rama dhe zv.kryeministri Erion Braçe se po i shërbente krimit të organizuar me urdhër-arrestin e lëshuar ndaj drejtorit të Kadastrës së Durrësit, Liridon Pula. Ndërkohë më herët ndoja është hetuar për pastrim parash dhe fshehje pasurie, por akuzat ndaj tij u rrëzuan nga Prokuroria.
Ndërsa në korrik 2018, emri i Ndojës u lakua sërish pas dhunës së ushtruar ndaj avokatit Ilia Ilia pas daljes së këtij të fundit nga Gjykata e Durrësit. Avokati Ilia akuzoi prokurorin Ndoja se qëndronte pas dhunës së ushtruar ndaj tij.
