Këshilli i Lartë i Prokurorisë i kërkoi kryeprokurores Arta Marku të nisë hetim disiplinor ndaj prokurorit të Durrësit Arjan Ndoja, për afrinë e tij me persona me precedentë penalë dhe deklaratat për zotërimin e një zyre konsulence ligjore.
Këshilli i Lartë i Prokurorisë i kërkoi Prokurorisë së Përgjithshme të nisë hetim disiplinor ndaj prokurorit të Durrësit, Arjan Ndoja, pas një interviste ku ky i fundit pranonte angazhimin si avokat dhe konsulent ligjor si dhe për shoqërimin e tij me persona me precedentë penalë.
Ndoja u përshi në një atentat në mbikalimin e Shkozetit në Durrës, ku mbeti i plagosur ai vetë, shoferi Andi Maloku si dhe një person tjetër i identifikuar si Aleksandër Laho- emri i vërtetë i të cilit është Landi Muharremi i dyshuar për përfshirje në krimin e organizuar.
KLP shprehet se kjo “është një ngjarje e rëndë në radhët e magjistratëve si dhe të sistemit të drejtësisë në vend”.
“Nisur nga të dhëna paraprake si dhe nga një prononcim dhëne për median A2 Neës nga prokurori Ndoja, bëhet me dije fakti që prokurori drejton prej kohësh një studio ligjore ku ofron konsulencë ligjore për çështje të ndryshme. Ky fakt, nëse do të rezultonte i vërtetë, do të përbënte shkelje disiplinore të parashikuara në nenin 103 pika a dhe ç, të ligjit 96/2016 “Për statusin e gjyqtarëve dhe prokurorëve në Republikën e Shqipërisë”, thuhet në kërkesën që kreu i KLP Genti Ibrahimi i dërgon Prokurores së Përgjithshme të Përkohshme, Arta Marku.
Dy shkeljet e mundshme të përmendura prej Ibrahimit përfshijnë “shoqërimi me persona që janë nën ndjekje penale” apo marrëdhëniet e biznesit me ta dhe pasjen e veprimtarive qoftë të ligjshme, por që bien në kundërshtim me statusin e magjistratit.
KLP kërkon “nisjen e një hetimi disiplinor ndaj prokurorit Arjan Ndoja, duke gjykuar nëse janë konsumuar apo jo prej tij shkeljet disiplinore të parashikuara nenin 103 pika a dhe ç, të ligjit 96/2016 “Për statusin e gjyqtarëve dhe prokurorëve në Republikën e Shqipërisë”.
KLP po ashtu i referohet dispozitave tranzitorë të ligjit “Për statusin e gjyqtarëve dhe prokurorëve në Republikën e Shqipërisë” të cilat ngarkojnë Prokurorin e Përgjithshëm me detyrën qe të hetojë të gjitha pretendimet për shkeljet disiplinore në rradhët e prokurorëve për sa kohë nuk është krijuar Inspektoriati i Lartë i Drejtësisë.
Prokurori Arjan Ndoja u targetua në fillim të tetorit nga kryeministri Edi Rama dhe zv.kryeministri Erion Braçe se po i shërbente krimit të organizuar me urdhër-arrestin e lëshuar ndaj drejtorit të Kadastrës së Durrësit, Liridon Pula. KLP mbajti pas kësaj një qëndrim që kërkonte edhe mbrojtjen e magjistratëve nga sulmet politike edhe hetimin e akuzave. Ndërkohë më herët, Ndoja është hetuar për pastrim parash dhe fshehje pasurie, por akuzat ndaj tij u rrëzuan nga Prokuroria.
Është e paqartë nëse Prokuroria e Përgjithshme do marrë në konsideratë kërkesën e KLP, pasi më herët BIRN gjeti se një mori referimesh disiplinore ndaj magjistratëve, të kërkuara nga Komisioni i Pavarur i Kualifikimit mbeteshin pa u hetuar pasi mungonte baza ligjore dhe institucioni i Inspektorit të Lartë të Drejtësisë.
