Një sërë fushatash online dhe në sheshe mbledhin miliona në ushqime dhe në ndihma financiare që pritet të përdoren në rindërtimin e zonave të prekura. Qindra hapin dyert e shtëpive.
Disa dhjetra mijëra shqiptarë të diasporës, të huaj dhe biznese kanë dhuruar rreth 3.6 milion dollarë deri në pasditen e djeshme kryesisht përmes faqes “GoFundMe” dhe Facebook, për të prekurit nga tërmeti në Durrës. Dhurimet vijojnë ndërsa vendi ende nuk ka një bilanc të qartë të shtëpive të dëmtuara, ndërsa zyrtarisht ministria e Mbrojtjes njoftoi 47 viktima deri të enjten në mbrëmje.
“Kemi parë një përpjekje gjigande për mbledhje fondesh në GoFundMe, për të ndihmuar ata që janë prekur nga tërmeti të të martës në Shqipëri”, tha në një komunikim me e-mail Elisa Liberatori Finoçhiaro, Menaxhere Rajonale për Europën e Jugut e GoFundMe (GFM).
“Janë 904 fushata të krijuara në vende të ndryshme në Europë, Australi dhe Amerikën e Veriut, të cilat kanë mbledhur pak nën 2.2 milion dollarë, ne presim që sot të mëbrrijë në 2.5 milion,” tha ajo.
Drejtuesit e GFM thonë se po punojnë që gjithë kjo mbështetje e fuqishme të mbërrijë në vendin e duhur. GMF është një nga mbledhësit më të mëdhej të fondeve për causa të ndryshme në botë dhe garanton dhuruesit që paratë e dhuruara të mos abuzohen dhe të shkojnë për atë që janë dhuruar.
Dhurimet sipas GMF kanë ardhur nga 76 shtete të ndryshme. Një pjesë e mirë e dhuruesve janë shqiptarë të diasporës, . Dy fushatat më të mëdha të ndërmarra nga organizatat shqiptare të bamirësisë “Fundjavë Ndryshe” me 1.4 milion dollarë dhe “Shqiptarët për Shqiptarët” me 590 mijë dollarë, kanë mbledhur shumicën e dhurimeve. Ndërkohë një mori fushatash të tjera kanë mbledhur shuma të konsiderueshme ndihme.
Paralelisht një nismë e organizatës “Rrënjët Shqiptare” me qendër në Nju Jork ka mbledhur përmes sistemit të dhurimeve në Facebook 1.2 milion dollarë. Marko Kepi drejtues i organizatës shkroi në këtë faqe se paratë do të dërgoheshin në Shqipëri dhe do përdoreshin për të blerë banesa të reja për personat e mbetur pa strehë.
Në një sistem të vetin online qeveria shqiptare njofton se deri në mesditën e të enjtes ishin dhuruar 156 milion lekë, 1.6 milion euro dhe 25 mijë dollarë. Në dhurime të veçanta Kosova (500 mijë), Austria (600 mijë) dhe Maqedonia e Veriut (100 mijë) kanë premtuar rreth 1.2 milion euro.
Në një postim në Facebook ministri i Jashtëm në ikje i Kosovës Bexhet Pacolli premtoi se do të dhuronte familjarisht 1 milion euro për ndërtimin e banesave të prishura.
Nga ana tjetër qindra qytetarë janë solidarizuar duke ofruar ndihma në ushqime dhe veshmbathje. Karvanë me ushqime dhe rroba kanë ardhur për dy ditë rrjesht nga Kosova. Dhjetra njerëz u shfaqën në video duke dhuruar të ardhurat të pensionit. Një i moshuar tha duke qarë se kishte qëndruar në Durrës 3 muaj si refugjat, ndërsa dhuroi 110 euro të pensionit të tij.
Ndihma të ngjashme u mblodhën në të gjitha qytetet e vendit, ndërsa batanije e çadra u sollën nga Italia dhe Turqia. Në një postim në Facebook, kryeministri Edi Rama kërkoi që të ndalohej mbledhja e ndihmave të kësaj natyre, pasi nuk kishte më hapësirë magazinimi. Rama tha se dhurimet duhej të bëheshin në vlera monetare dhe të përdoreshin në rindërtim.
Ndërkohë në disa faqe online prej ditësh publikohen njoftime për shtëpi të lira apo hotele që presin të strehojnë të pastrehët. Kallxo.com publikoi një listë me banorë dhe biznese që ofronin strehim në Kosovë.