Numri i viktimave të tërmetit të 26 nëntorit shkoi në 40 mëngjesin e të enjtes. Qeveria apelon për koordinim të ndihmave në numrat zyrtarë, ndërsa iniciativat online mbledhin miliona dollarë në ndihmë të të mbijetuarve në Durrës dhe Thumanë.
Numri i personave të vdekur si pasojë e tërmetit të 26 nëntorit arriti në 40 mëngjesin e së enjtes. Ministria e Mbrojtjes tha se viktima e fundit ishte një grua, që u nxorr nga rrënojat e një pallati në Durrës. Ndërkohë, numri i atyre që mbeten ende në rrënoja është ende i paqartësuar zyrtarisht.
Ministria e Mbrojtjes bëri me dije ndërprerjen e kërkimeve në Thumanë, ku pas nxjerrjes së tre viktimave pas mesnatës së djeshme, nuk ka më të dhëna për njerëz të zhdukur. Kërkimet ndërkohë vazhdojnë në zonën e Kënetës në Durrës, ku kërkohen pjesëtarë të familjes Lala.
Sipas ministrisë, 23 viktima përfshi dy fëmijë u nxorrën nga rrënojat në Thumanë, ndërsa 16 të tjerë humbën jetën në Durrës. Një i ri humbi jetën në Laç. Në total u fol për mbi 650 të lënduar, nga të cilët 33 ndodhen në Spitalin e Traumës për shkak të plagëve të rënda. Kryeministri Edi Rama njoftoi ndërkohë dërgimin e një të riu në Bari, Itali për mjekim të mëtejshëm.
Operacionet e kërkim- shpëtimit u ndihmuan nga trupa të emergjencës prej Kosovës, Italisë, Greqisë, Serbisë, Rumanisë, Zvicrës dhe vendeve të tjera.
Ndërkohë në një përpjekje për t’u ardhur në ndihmë të mbijetuarve, në dy ditë organizata të ndryshme në Shqipëri dhe jashtë saj kanë mbledhur miliona dollarë në ndihma. Një organizatë në SHBA, Albanian Roots ka mbledhur deri në mëngjesin e së enjtes rreth 1.1 milion dollarë, ndërkohë “Fundjavë Ndryshe”, e cila është angazhuar edhe më herët në aktivitete bamirësie në Shqipëri, ka mbledhur 1.4 milion dollarë nga mbi 20 mijë dhurues në dy ditë. Qindra mijëra dollarë të tjerë janë mbledhur nga iniciativa më të vogla, përfshi këtu atë të këngëtares së njohur Bebe Rexha, kombëtares së futbollit e të ngjashme.
Nisma ndihme janë ndërmarrë edhe nga vende të tjera, kryesisht fqinje, ndërsa nga Kosova veç ndihmës financiare kanë dërguar disa karvanë me ushqime dhe veshmbathje. Ushqime dhe veshmbathje janë mbledhur po ashtu edhe në qytetet e Shqipërisë, ndërsa një sërë grupesh jo-qeveritare dhe bashkitë kanë organizuar fushata solidarizimi.
Ndërkohë në llogaritë bankare të vëna në dispozicion nga qeveria janë dhuruar deri në mëngjesin e sotëm rreth 9.4 milionë lekë. Duke u nisur nga fluksi i ndihmave sidomos në veshmbathje dhe ushqime, Ministrja e Mbrojtjes Olta Xhaçka kërkoi në një konferencë për shtyp koordinimin e tyre. Xhaçka publikoi tre numra telefonie: “04 22 22 223/ 04 22 28 250/ 00355688046664”. Ministrja tha se ishte e nevojshme që ndihmat të kalonin përmes rezervave të shtetit, në mënyrë që të mbërrinin te familjet e prekura sipas nevojës.
“Këta numra janë në dispozicion 24 orë për këdo që kërkon informacion mbi pikën e grumbullimit të ndihmave në rezervat e shtetit dhe në komandën mbështetëse të Forcave të Armatosura me qendër në Vaqarr, por edhe pika të tjera që po ngrihen në Tiranë, Durrës e qytete të tjera,” tha ajo. Numrat e telefonit po ashtu shërbejnë edhe për të koordinuar përpjekjet për strehim. Qindra qytetarë në Shqipëri dhe Kosovë kanë ofruar shtëpitë e tyre, për familjet e mbetura pa strehë.
Të njëjtin mesazh pati edhe kryeministri që tha gjatë një mbledhje qeveri mëngjesin e të enjtes se ndihma në ushqime dhe veshmbathje kishin qenë të mjaftueshme. Qeveria njoftoi edhe fillimin e trasferimit të të pastrehëve në hotele dhe zona të tjera për të shmangur qëndrimin në çadra për shkak të shiut.
Trasferimet filluan të mërkurën në mbrëmje në Durrës dhe pritet të kryhen edhe në zona të tjera. Ndërkohë në Thumanë dhe Durrës janë përcjellë për në banesën e fundit disa prej viktimave të tërmetit.