Këshilli i Emërimeve në Drejtësi për vitin 2020 do të drejtohet sërish nga Ardian Dvorani, ndërsa pritet plotësimi i Gjykatës Kushtetuese dhe zgjedhja e Inspektorit të Lartë të Drejtësisë.
Presidenca zgjodhi të enjten përmes shortit nëntë anëtarët e rinj të Këshillit të Emërimeve në Drejtësi, në praninë e presidentit Ilir Meta, drejtuesve të institucioneve të pavarura dhe vëzhguesve ndërkombëtarë.
Nga Gjykata Kushtetuese u zgjodhën përmes shortit Fiona Papajorgji dhe Vitore Tusha, ndërkohë që anëtarja e kontestuar, Marsida Xhaferllari u zgjodh anëtare zëvendësuese.
Kryetari aktual i KED-it, Ardian Dvorani u zgjodh automatikisht si kandidati i vetëm nga Gjykata e Lartë. Ndonëse është i paditur nga presidenti Meta për procedurat e zgjedhjes së anëtarëve të Gjykatës Kushtetuese, Dvorani do ta drejtojë Këshillin e Emërimeve në Drejtësi edhe gjatë vitit 2020.
Goglat zgjodhën sërish Arta Markun si përfaqësuese e Prokurorisë së Përgjithshme në KED, ndërkohë që anëtar zëvendësues u zgjodh Bilbil Mete. Përfaqësuesit e Prokurorisë së Apelit do të jenë Fatjona Memçaj dhe Ludovik Doda, ndërsa nga gjykatat e Apelit u zgjodhën Saida Dollani dhe Miranda Andoni.
Arjan Qafa do të përfaqësojë në Këshillin e Emërimeve në Drejtësi gjykatat administrative, ndërsa anëtare zëvendësuese u zgjodh Marjana Velçani Idrizi.
Zgjedhja e anëtarëve të rinj të Këshillit të Emërimeve në Drejtësi u zhvillua pas një furtune akuzash mes presidentit Meta dhe kryetarit të KED, Ardian Dvorani lidhur me procedurat e ndjekura për emërimin e anëtarëve të Gjykatës Kushtetuese. Pas shortit, Meta bëri thirrje për veprimtari transparentë gjatë vitit 2020.
Këshilli i Emërimeve në Drejtësi është një organ kolegjial me rëndësi kyçe në vlerësimin e kandidatëve për Gjykatën Kushtetuese dhe Inspektorin e Lartë të Drejtësisë- dy institucione ende jofunksionale që prej miratimit të reformës në drejtësi.
Anëtarët e KED
Ardian Dvorani, kryetar, Gjykata e Lartë
Fjona Papajorgji- Gjykata Kushtetuese
Vitore Tusha- Gjykata Kushtetuese
Arta Marku- Prokuroria e Përgjithshme
Miranda Andoni- Gjykata e Apelit Gjirokastër
Saida Dollani, Gjykata e Apelit për Krime të Rënda
Ludovik Dodaj, Prokuroria e Apelit Durrës
Fatjona Memçaj, Prokuroria e Apelit Tiranë
Arjan Qafa- Gjykata Administrative e Apelit
Anëtarët zëvendësues
Marsida Xhaferllari –Gjykata Kushtetuese
Bilbil Mete- Prokuroria e Përgjithshme
Nazmi Troka, Gjykata e Apelit Vlorë
Nezir Gjoka- Prokuroria e Apelit Tiranë
Marjana Velaçani Idrizi- Gjykata Administrative Durrës
