Thirrjes së KLP për shprehje interesi për pozicionin e drejtuesit të SPAK i janë përgjigjur tre prokurorët Arben Kraja, Altin Dumani dhe Edvin Kondili.
Këshilli i Lartë i Prokurorisë, KLP, njoftoi të martën kandidatët të cilët kanë shprehur interesin për pozicionin e Drejtuesit së Prokurorisë së Posaçme kundër Korrupsionit dhe Krimit të Organizuar, SPAK.
KLP sqaron në njoftimin e saj se të martën, kur përfundonte edhe afati për aplikim janë dorëzuar tre kërsesat. “Në afatin të përcaktuar nga Këshilli i Lartë i Prokurorisë, thirrjes për shprehje interesi i janë përgjigjur tre kandidatë, Arben Kraja, Edvin Kondili dhe Altin Dumani”, citohet në njoftim. Aty shpjegohet se tre kandidatët kanë dorëzuar pranë Këshillit letrën e motivimit dhe vizionin apo planin për ndërtimin e Prokurorisë së Posaçme si një institucion funksional dhe efektiv.
SPAK duhej të ngrihej me 10 prokurorë që kishin kaluar vetingun me vendim të formës së prerë, por KLP vendosi unanimisht të hënën më 25 nëntor, që emërojë tetë prokurorët e listuar më parë: Altin Dumani i cili aktualisht është drejtues i Prokurorisë së Apelit për Krimet e Rënda; Arben Kraja, prokuror në Prokurorinë e Përgjithshme; Edvin Kondili, Behar Dibra, Klodian Braho dhe Ened Nakuçi në Prokurorinë për Krime të Rënda, Elida Celami(Kaçkini) në Prokurorinë e Tiranës dhe Enkeleda Millonai në atë të Elbasanit. Burime nga KLP i thanë atëherë BIRN se kjo nuk pengonte nisjen e punës, ndërsa më vonë sipas tyre, drejtuesi i SPAK mund të caktonte prokurorët që i mungojnë strukturës apo të kryejë emërime të përkohshme.
Metodologjia për vlerësimin e kandidatëve për pozicionin e drejtuesit të SPAK merr sipas KLP në konsideratë disa kritere, pwrfshi eksperiencën në ndjekjen e çështjeve sensitive dhe imazhin publik të kandidatëve.
