Këshilli i Emërimeve në Drejtësi njoftoi një renditje paraprake të kandidatëve për Inspektor të Lartë të Drejtësisë. Metani aktualisht Avokat i Shtetit u rendit i pari me 89.6 pikë, ndërsa menjëherë pas tij u rendit prokurori Sokol Stojani me 89 pikë. Opozita e ka cilësuar kandidimin e Metanit si antikushtetues.
Këshilli i Emërimeve në Drejtësi njoftoi një renditje paraprake të kandidatëve për Inspektor të Lartë të Drejtësisë. Sipas pikëzimit paraprak të njoftuar nga KED ditën e hënë, Artur Metani, i emëruar një vit më parë nga kryeministri Edi Rama si Avokat i Shtetit u rendit i pari me 89.6 pikë. Menjëherë pas Metanit me 0.6 pikë më pak u rendit prokurori Sokol Stojani.
“Rezultati paraprak i pikëzimit për secilin kandidat të vlerësuar është si më poshtë: Artur Metani 89.6 pikë, Eris Hysi 78.3 pikë, Joana Asimi Sorraj 82.5 pikë, Lindita Troja 63.4 pikë, Sokol Stojani 89 pikë”, njoftoi KED.
KED megjithatë njoftoi se renditja ishte paraprake. Sipas njoftimit të Këshillit një renditje e dytë dhe përfundimtare do të bëhej në mbledhjen e ardhshme.
“Pas shqyrtimit dhe miratimit të këtyre akteve në mbledhjen e ardhshme të Këshillit të Emërimeve në Drejtësi, organit të emërtesës, Kuvendit të Republikës së Shqipërisë, do ti dërgohen Lista Përfundimtare e Renditjes së Kandidatëve dhe Raporti i Arsyetuar i Këshillit ku përmbahet analiza lidhur me plotësimin ose jo të kushteve ligjore të kandidimit nga secilit kandidat në vendin vakant të Inspektorit të Lartë të Drejtësisë, për procedurën e ndjekur në vlerësimin, pikëzimin dhe renditjen e kandidatëve të lejuar, si edhe aktet përkatëse të verifikimit dhe të vlerësimit e pikëzimit për secilin kandidat”, thuhet në njoftim.
ILD që pritet të zgjidhet mes tre kandidatëve të renditur të parët nga KED është një nga institucionet e reja më të rëndësishme të drejtësisë. Inspektori do të ketë në dorë hetimin e abuzimeve nga gjyqtarët e të gjitha shkallëve dhe prokurorët. Po ashtu do të hetojë dhe ndjekë procedimet disiplinorë edhe ndaj anëtarëve të Këshillit të Lartë të Prokurorisë dhe Këshillit të Lartë Gjyqësorë.
Kandidatët kryesorë sipas renditjes paraprake të KED duken të jenë Avokati i Shtetit Artur Metani dhe prokurori Sokol Stojani.
Metani, i cili ka shërbyer si këshilltarë për presidentët Alfred Moisiu dhe Bamir Topi, është akuzuar nga Partia Demokratike si zgjedhje direkte e kryeministrit. Në një deklaratë për shtyp në gusht të këtij viti PD e cilësoi kandidimin e Metanit të paligjshëm duke vënë në dukje se ai kishte mbajtur poste politike si këshilltar i presidentit deri në vitin 2012 dhe se kjo duhej ta kishte skualifikuar atë automatikisht.
Prokurori Stojani e ka filluar karrierën në sistemin e drejtësisë në vitin 1994 dhe ka punuar për disa vite në Prokurorinë e Tiranës. Në vitin 2008, ai është emëruar prokuror në Prokurorinë e Përgjithshme dhe përgjatë 10 viteve të fundit ka mbajtur disa poste drejtuese, përfshirë edhe atë të anëtarit të Këshillit të Prokurorisë.
