Kryebashkiaku socialist i Mallakastrës Qerim Ismailaj u akuzua të Premten nga Partia Demokratike se ka fshehur një dënim me tre vjet burg në Greqi nga formulari i vetëdeklarimit të pastërtisë së figurës, gjë që e skualifikon automatikisht nga mbajtja e këtij posti.
Qerim Ismailaj fitoi postin e kryetarit të Bashkisë Mallakastër në vitin 2019 me 92% të votave, por 45 vjeçari i diplomuar për drejtësi në vitin 2011 në Universitetin Kristal mund të ketë fshehur një dënim me burg në ishullin e Kiosit në Greqi në vitin 2000, denoncoi të premten Partia Demokratike.
Sipas Partisë Demokratike, ai është dënuar për kryerjen e veprimeve të dhunshme por nuk e ka vuajtur dënimin.
“Sipas ligjit të dekriminalizimit, Qerim Ismailaj nuk mund të ushtrojë asnjë funksion publik, aq më pak të jetë kandidat për Kryetar Bashkie. Ai është subjekt ndalimi sipas ligjit dhe duhet menjëherë të procedohet penalisht për falsifikimin e formularit të dekriminalizimit,” deklaroi të premten Gazmend Bardhi, sekretar i PD-së.
PD denoncoi Ismailajn fillimisht tre ditë më parë, ndërsa të premten shkoi më tutje duke publikuar një dokument të prokurorisë greke. BIRN nuk ishte në gjendje të verifikonte në mënyrë të pavarur vërtetësinë e dokumentit të paraqitur.
Duke folur për mediat pas denoncimit të parë, Ismailaj hodhi poshtë akuzat duke deklaruar se është i hapur për verifikime dhe se “nuk është ndaluar asnjëherë nga policia e Greqisë”.
Partia Demokratike ka denoncuar më herët edhe tre kryebashkiakë të tjerë, dy nga të cilët janë detyruar të heqin dorë nga postet për shkak të gënjeshtrave në formularin e dekriminalizimit.
I pari, Valdrin Pjetri, u detyrua të heqë dorë nga posti i kryebashkiakut të Shkodrës pasi fitoi zgjedhjet pa garë të qershorit 2019 duke u bërë i pari kryetar vendor në Shkodër nga rradhët e socialistëve që nga rënia e komunizmit. Ai hoqi dorë nga marrja e postit për shkak se Partia Demokratike zbuloi një dënim të tij për drogë në vitin 2003.
Agim Kajmaku, i cili u zgjodh kryebashkiak i Vorës për socialistët, gjendet aktualisht në kërkim policor.
PD ka denoncuar ndërkohë edhe kryebashkiakun e Vaut të Dejës Mark Babani, i cili mohon akuzat. Sipas PD-së, ky person është arrestuar në Sicili nën emrin Marq Babaj për vjedhje.
Aktualisht tre bashki në vend, Shkodra, Vora dhe Durrësi, kanë mbetur pa kryetarë për shkak të shkarkimeve në dy të parat dhe dorëheqjes së kryebashkiakes Valbona Sako. Në një situatë normale, në këto bashki do të duhej të ishin zhvilluar zgjedhje të parakohshme për kryetar, por presidenti i republikës Ilir Meta nuk njeh si të vlefshme zgjedhjet e vitit 2019 dhe për rrjedhojë, nuk pranon të dekretojë zgjedhje të parakohshme për bashkitë pa kryetarë.
