Presidenti i Kosovës, Sekretari i Përgjithshëm i NATO-s, diplomatë amerikanë dhe të tjerë kanë përshëndetur nënshkrimin e një marrëveshjeje për të rivendosur fluturimet midis Beogradit dhe Prishtinës.
Liderët serbë, kosovarë dhe të NATO-s mirëpritën të hënën nënshkrimin e një marrëveshje për rihapjen e linjës ajrore midis Prishtinës dhe Beogradit që u ndërpre 21 vjet më parë. Diplomatët amerikanë mbikëqyrën nënshkrimin e marrëveshjes në Berlin.
Presidenti i Kosovës Hashim Thaçi e përshkroi zhvillimin si të rëndësishëm. “Ky është një hap i rëndësishëm për lëvizjen e qytetarëve dhe procesin e normalizimit”, tha Thaci në Twitter, duke falënderuar të dërguarin special të SHBA-së për bisedimet Serbi-Kosovë, Richard Grenell, dhe Këshilltarin e Sigurisë Kombëtare të Shteteve të Bashkuara, Robert C. O’Brien, për lehtësimin e procesit.
Të dy vendet aktualisht lidhen vetëm me autobus, me udhëtimin nga njëri kryeqytet në tjetrit që zgjat rreth gjashtë orë.
Drejtori i zyrës së qeverisë serbe për Kosovën, Marko Djuriç, gjithashtu konfirmoi lajmin për televizionin publik të Serbisë, RTS. “Përveç 12 autobusëve që lidhin rregullisht Beogradin dhe Prishtinën, së shpejti mund të lidhemi edhe me një kompani ajrore, për herë të parë në 20 vjet”, tha ai.
Djuriç tha gjithashtu se kjo mund të vihet në jetë pasi Kosova të heqë tarifat që u ka vendosur produkteve nga Serbia dhe të vazhdojë dialogun e ndërmjetësuar nga BE-ja për normalizimin e marrëdhënieve.
Sekretari i Përgjithshëm i NATO-s, Jens Stoltenberg, e përshëndeti marrëveshjen si “një hap i rëndësishëm, i cili do ta bëjë më të lehtë dhe më të shpejtë qarkullimin e njerëzve dhe mallrave brenda rajonit të Ballkanit Perëndimor”.
Rivendosja e një ure ajrore midis Prishtinës dhe Beogradit, e prishur pasi konflikti i Kosovës u përshkallëzua në fund të viteve 1990, nuk do të lehtësojë në vetvete vështirësitë e shkaktuara nga fakti se Serbia nuk e njeh pavarësinë e ish-krahinës së saj.
Duke qenë se Serbia nuk njeh as dokumentet e Kosovës dhe as ndonjë kufi shtetëror, shtetasit e huaj që përdorin rrugën e re ajrore do të duhet të udhëtojnë nga Beogradi në Prishtinë dhe pastaj të kthehen në Beograd, për shembull. Ata gjithashtu nuk do të jenë në gjendje të fluturojnë nga Prishtina drejt Beogradit, nëse kanë hyrë në Kosovë nëpërmjet një kufiri që nuk njihet nga Beogradi.
